މިހާރު ރާއްޖެއަށް ކުރަމުންދާ ވިއްސާރައިގައި ހދ. ނޮޅިވަރަމަށް ބޯކޮށް ވާރޭވެހި ރަށުތެރޭގައި ފެންބޮޑުވެ، ބައެއް ގެތަކަށް ފެންވަދެ ގެއްލުންތަކެއް ލިބިއްޖެއެވެ.

ނޭޝަނަލް ޑިޒާސްޓަރ މެނޭޖްމަންޓް އޮތޯރިޓީ (އެންޑީއެމްއޭ) އިން މަޢުލޫމާތު ދެއްވި ގޮތުގައި، ނޮޅިވަރަމަށް މިއަދު ހެނދުނު 11:30 އިން ފެށިގެން މެދުކެނޑުމެއްނެތި ބޯކޮށް ވާރޭވެހުމުގެ ސަބަބުން ރަށުގެ އެކި ސަރަޙައްދުތަކުގައި ވަނީ ފެންބޮޑުވެފައެވެ.

އަދި މިހާތަނަށް ލިބުނު މަޢުލޫމާތަށް ބަލާއިރު، އެ ރަށުގެ ތިން ގެއަކަށް ފެންވަދެގެން ވަނީ އެންޑީއެމްއޭއަށް ރިޕޯޓްކޮށްފައެވެ.

ފެންބޮޑުވުމާ ގުޅިގެން ރަށުތެރެއިންނާއި ގެތަކުން ފެން ހިންދުމަށްޓަކައި، ފެންހިއްކުމުގެ ޢަމަލީ މަސައްކަތްތައް ފެށުމަށް ނޮޅިވަރަމު ކައުންސިލުން މިހާރު ދަނީ ތައްޔާރުވަމުންނެވެ.

މޫސުމާ ބެހޭ ޤައުމީ އިދާރާ (މެޓް) އޮފީހުން ލަފާކޮށްފައިވާ ގޮތުގައި ކުރިއަށް އޮތް ތިން ދުވަހުވެސް ރާއްޖޭގެ އެކި ހިސާބުތަކަށް މޫސުން އިތުރަށް ގޯސްވާނެއެވެ. ހުކުރު ދުވަހުން ފެށިގެން މުޅި ރާއްޖެއަށް މޫސުން ގޯސްވެ ވިއްސާރަ ކުރަމުންދާ ވިއްސާރައިގައި އެކި ރަށްރަށަށް ބޮޑެތި ގެއްލުންތައް ލިބިގެންދަނީ ރިޕޯޓުކުރަމުންނެވެ.