ސަސްޕެންސް އަދި ތްރިލަރ ފިލްމުތައް އުފެއްދުމުގައި މަޝްހޫރުކަން ހޯދާފައިވާ ޑައިރެކްޓަރުން ކަމަށްވާ އައްބާސް-މުސްތާން ގެ އާ ފިލްމު "3 މަންކީސް" ގެ ފަސްޓް ލުކް ޕޯސްޓަރު އާންމުކޮށްފިއެވެ.

މި ވަރުގަދަ ތްރިލަރ ފިލްމުގައި މުސްތަފާ ބުރުމާވާލާގެ އިތުރުން މަޝްހޫރު އެކްޓަރ އަރްޖުން ރާމްޕާލް ވެސް މުހިންމު ރޯލަކުން ފެނިގެންދާނެއެވެ.

މުސްތަފާ އޭނާގެ ސޯޝަލް މީޑިއާގައި މި ފިލްމުގެ ޕޯސްޓަރު ހިއްސާކުރުމާއެކު، އައްބާސް-މުސްތާންގެ ޚާއްޞަ ސްޓައިލްގެ ސަސްޕެންސް ފިލްމުތަކަށް ލޯބިކުރާ ފަރާތްތަކުގެ ސަމާލުކަން ވަނީ މި ފިލްމަށް ލިބިފައެވެ.

މި ފިލްމާއި ގުޅޭ މާބޮޑު މައުލޫމާތުތަކެއް އަދި ނޭނގުނު ނަމަވެސް އައްބާސް-މުސްތާން އަކީ "ބާޒީގަރް" އާއި "ރޭސް" ފަދަ ކާމިޔާބު އެތައް ތްރިލަރ ފިލްމުތަކެއް ބެލުންތެރިންނާ ހަމައަށް ގެނެސްދީފައިވާ ކުޅަދާނަ ދެ ޑައިރެކްޓަރުން ކަމަށްވުމުން، "3 މަންކީސް" ވެސް ވެގެންދާނީ ބެލުންތެރިން ޝައުގުވެރިކުރުވާނެ ފަދަ އުފެއްދުމަކަށް ކަމަށް ވަނީ ބެލެވިފައެވެ.

މި ފިލްމު ސިނަމާތަކުގައި އެޅުވުމަށް ހަމަޖެހިފައިވަނީ މި އަހަރުގެ ޑިސެމްބަރު 4 ވަނަ ދުވަހުއެވެ.