ބްލޮކްބަސްޓަރ ފިލްމު "ދުރަންދަރ" އިން ގިނަ ބައެއްގެ މަޤުބޫލުކަން ހޯދި މަޝްހޫރު ބޮލީވުޑް ތަރި އަކްޝޭ ކަންނާ، މުމްބާއީގެ އެންމެ އަގުބޮޑު އެއް ސަރަހައްދު ކަމަށްވާ މަލަބާރް ހިލް އިން 33.26 ކްރޯޑު ރުޕީސްގެ އަގުބޮޑު ލަގްޒަރީ އެޕާޓްމަންޓެއް ގަނެފިއެވެ.

ޕްރޮޕަޓީ ރަޖިސްޓްރޭޝަން ލިޔެކިޔުންތަކުން ދައްކާގޮތުގައި، މި މުޢާމަލާތް ރަޖިސްޓްރީކޮށްފައިވަނީ މިދިޔަ މަހުގެ ތެރޭގައިއެވެ.

މަލަބާރް ހިލް ރޯޑުގެ '30 ލިޓްލް ގިބްސް' ގައި ހުންނަ މި އެޕާޓްމަންޓްގެ ޖުމްލަ ބޮޑުމިނުގައި 2,516 އަކަފޫޓު ހުންނައިރު، އޭގެ ތެރޭގައި 175 އަކަފޫޓުގެ ބެލްކަނީ އޭރިއާއެއް ވެސް ހިމެނެއެވެ. މީގެ އިތުރުން 3 ކާރު ޕާކިންގ ޖާގަ ވެސް މި އެޕާޓްމަންޓާއެކު ލިބެއެވެ.

މި އެޕާޓްމަންޓް ގަތުމަށް 1.99 ކްރޯޑު ރުޕީސް ސްޓޭމްޕް ޑިއުޓީގެ ގޮތުގައި ދައްކާފައިވާއިރު، ރަޖިސްޓްރޭޝަން ފީގެ ގޮތުގައި 30،000 ރުޕީސް ވަނީ ދައްކާފައެވެ.

މުމްބާއީގެ މަލަބާރް ހިލް އަކީ ގިނަ އަދަދެއްގެ މަހުޖަނުންނާއި، ވިޔަފާރިވެރިންގެ އިތުރުން މަޝްހޫރު ފިލްމީ ތަރިންވެސް ދިރިއުޅެމުން އަންނަ ވަރަށް ހިތްގައިމު ސަރަހައްދެކެވެ.

ދާދި ފަހުން ނެރުނު "ދުރަންދަރ" ގައި އަކްޝޭ ކުޅުނު 'ރަހްމާން ޑަކައިތު' ގެ ރޯލަށް ބެލުންތެރިންގެ ފަރާތުން ބޮޑު ތަރުހީބެއް ލިބިފައިވާއިރު، އޭނާ ދެން އެންމެ އަވަހަށް ފެނިގެންދާނީ 2027 ގައި ނެރޭ ފިލްމު "މަހާކާލީ" އިންނެވެ.