ޑެސްޓިނޭޝަން ޕްރިންސިޕަލްގައި ހުރި ކަންބޮޑުވުންތަކަށް ހައްލު ގެނެސްދޭނެ ފަތުރުވެރިކަމާ ބެހޭ ވަޒީރު މުޙައްމަދު އަމީން ވިދާޅުވެއްޖެއެވެ.

ޤައުމީ ފަތުރުވެރިކަމުގެ ދުވަސް ފާހަގަކުރުމަށް ބޭއްވި ރަސްމިއްޔާތުގައި ވާހަކަދައްކަވަމުން ވަޒީރު އަމީން ވިދާޅުވީ ވޭތުވެދިޔަ ދެ މަސްދުވަހުގެ ތެރޭގައި ޑެސްޓިނޭޝަން ޕްރިންސިޕަލްގެ އުސޫލުން ޓީޖީއެސްޓީ ދެއްކުމުގެ އިތުރު ބައިތަކެއް ހިމަނައިގެން ޤާނޫނަށް ބަދަލުތަކެއް ގެނެވިފައިވާ ކަމަށެވެ.

މި ބަދަލުތަކާ ގުޅިގެން ފަތުރުވެރިކަމުގެ ދާއިރާގެ އިސް ފަރާތްތަކާއި ޓްރެވަލް އޭޖެންޓުންގެ ވަރަށް ބޮޑެތި ކަންބޮޑުވުންތަކެއް ހުރިކަން ސަރުކާރަށް ފާހަގަކުރެވިފައިވާ ކަމަށާއި އެ ކަންބޮޑުވުންތައް މައިގަނޑު ގޮތެއްގައި ގުޅިފައިވަނީ ކަނޑައެޅިފައިވާ މުއްދަތުތަކާއި އެކަމުގައި ހިމެނޭ އެހެނިހެން ސަބަބުތަކާކަން ފާހަގަކުރެއްވިއެވެ.

މީގެއިތުރުން އެ މައްސަލަތަކާ ގުޅިގެން އިންޑަސްޓްރީގެ ގިނަ ފަރާތްތަކަކުން ރައީސުލްޖުމްހޫރިއްޔާގެ އަރިހަށް ހުށަހެޅުންތައް ފޮނުވާފައިވާކަން ފާހަގަކުރައްވާ ވަޒީރު ވަނީ ޑެސްޓިނޭޝަން ޕްރިންސިޕަލްގެ އުސޫލުން ޓީޖީއެސްޓީ ޤާނޫނަށް ވަރަށް އަވަހަށް ބަދަލުތަކެއް ގެނައުމަށް ރައީސް ނިންމަވާފައިވާ ކަމަށެވެ.