އާންމު ތަންތަނާއި މަގުމަތީގައި ދިރިއުޅޭ އުޅޭ ބިދޭސީންނާއި ފަތުރުވެރިން އާންމު އިޖުތިމާއީ މިންގަނޑުތަކާއި އެއްގޮތަށް ހެދުން އެޅުމަށް ފުލުހުން އިލްތިމާސްކޮށްފި އެވެ.

ފުލުހުން ނެރުނު ނޫސްބަޔާނެއްގައި ބުނީ ދިވެހި މުޖުތަމައުގެ އަހުލާގީ އަދި އާންމު އިޖުތިމާއި މިންގަނޑުތައް ހިފެހެއްޓުމަކީ ރާއްޖޭގައި ދިރިއުޅޭ އެންމެހައި ފަރާތްތަކުން އަދާކުރަންޖެހޭ އާންމު މަސްއޫލިއްޔަތަކަށް ވީއިރު، ރާއްޖޭގައި ދިރިއުޅޭ ބިދޭސީން ދިވެހި މުޖުތަމައުގެ ސަގާފަތާއި އާދަކާދަ އަށް އިހުތިރާމްކޮށް، އާންމު ތަންތަނާއި މަގުމަތީގައި އުޅޭއިރު، އިޖުތިމާއީ އަދި އަހުލާގީ މިންގަނޑުތައް ހިފެހެއްޓުމަށް ރާއްޖޭގައި ދިރިއުޅޭ ބިދޭސީންނަށާއި ފަތުރުވެރިންނަށް ދިވެހި ފުލުހުންގެ ހިދުމަތުން ހަނދާންކޮށްދީފި އެވެ.

ނަމަވެސް މިހާރަކަށް އައިސް ރާއްޖޭގައި ދިރިއުޅޭ ބައެއް ބިދޭސީން އާންމު އިޖުތިމާއި މިންގަނޑުތަކާ ހިލާފަށް ނިވާކަން ކުޑަކޮށް ހެދުން އަޅައިގެން މަގުމަތީ އަދި އެނޫން އާންމު ތަންތަނުގައި އުޅޭކަން ފުލުހުން ފާހަގަކުރި އެވެ. އަދި ބައެއް ބިދޭސީންގެ މިފަދަ އަމަލުތަކަކީ މުޖުތަމައުގެ އާންމު ސުލޫކު އަދި އަހުލާގީ މިންގަނޑުތަކާ ހިލާފު އަމަލުތަކެއްކަމާއި، އޭގެ ސަބަބުން މުޖުމަތަމައުގެ ހިދުމަތަށް މަތިކޮށްފައިވާ ގާނޫނީ ޒިންމާ އަދާކޮށް އެފަދަ ފަރާތްތަކާއިމެދު "އާންމު މިންގަނޑުތަކާއި ހިލާފު އަމަލުތައް ހުއްޓުވުމުގެ ގާނޫނު" ގެ ދަށުން އަޅަންޖެހޭ ފިޔަވަޅެއްވިޔާ ފުލުހުން އަޅާނެ ކަމަށެވެ.

މީގެ އިތުރުން އާންމު އިޖުތިމާއީ މިންގަނޑުތައް ހިފެހެއްޓުމުގެ ގޮތުން، ބިދޭސީންގެ ކިބައިން މިފަދަ އަމަލުތައް ނުފެންނާނެ ގޮތަކަށް އަމަލުތައް ބެހެއްޓުމަށް މައުލޫމާތުދީ ހޭލުންތެރިކުރުވުމަށް ފުލުހުން އިލްތިމާސްކޮށްފަ އެވެ.

ރާއްޖެއަށް ޒިޔާރަތްކުރާ ފަތުރުވެރިންނަށް ޚާއްސަކޮށް ކަނޑައެޅިފައިވާ ސަރަހައްދުތައް ފިޔަވައި، އެނޫން އާންމު ތަންތަނާއި މަގުތަކުގައި ފަތުރުވެރިން އުޅޭއިރު ދިވެހި މުޖުތަމައުގެ ސަގާފަތާއި އާދަކާދައަށް އިހުތިރާމުކުރުމަށް ފުލުހުން އެދިފައިވެ އެވެ. އަދި މުޖުތަމައުގެ އާންމު އިޖުތިމާއީ މިންގަނޑުތަކާ އެއްގޮތަށް ހެދުން އެޅުމަށް، ފަތުރުވެރިންނަށް ޚިދުމަތް ދޭ ފަރާތްތަކުން ޚާއްސަ ސަމާލުކަމެއް ދިނުމަށް ފުލުހުން ވަނީ ހަނދާންކޮށްދީފަ އެވެ.

ފުލުހުން ވަނީ މި ގަވައިދާ ހިލާފަށް އަމަލުކުރާ ފަރާތްތަކާމެދު ގާނޫނީ ފިޔަވަޅު އަޅާނެކަމަށް ތަކުރާރުކޮށް ހަނދާންކޮށްދީފަ އެވެ.