ރާއްޖޭގެ އެންމެ ދެކުނުގައި އޮންނަ ފުވައްމުލައް ސިޓީއާއި އައްޑޫ އަތޮޅުގައި ފެނާއި ނަރުދަމާގެ ޚިދުމަތާ މާލޭ ވޯޓަރ އެންޑް ސުވަރޭޖް ކޮމްޕެނީ - އެމްޑަބްލިޔުއެސްސީން ހަވާލުވާން ނިންމައި އެކަމާ ގުޅޭ ފްރޭމްވޯކް އެއްބަސްވުމުގައި ސޮއިކޮށްފިއެވެ.

މި އެއްބަސްވުމުގައި އެމްޑަބްލިޔުއެސްސީގެ ފަރާތުން ސޮއިކުރެއްވީ މެނޭޖިންގ ޑިރެކްޓަރ ޙުސައިން ފަހުމީއެވެ. އަދި މިހާރު އެ ދެ އަތޮޅުގައި ޚިދުމަތް ދެމުން އަންނަ ފެނަކަ ކޯޕަރޭޝަންގެ ފަރާތުން ސޮއިކުރެއްވީ މެނޭޖިންގ ޑިރެކްޓަރ މުޙައްމަދު އަފީފް ޙުސައިނެވެ.

ފެނަކަ ކޯޕަރޭޝަނަކީ ސަރުކާރުން އުވާލަން ނިންމާފައިވާ ކުންފުންޏެކެވެ. އަދި އެމްޑަބްލިޔުއެސްސީގެ 100 އިންސައްތަ ހިއްސާއަކީ ދިވެހި ސަރުކާރުގެ ހިއްސާއަށް ހެދުމަށް ސަރުކާރުން ވަނީ މަސައްކަތް ފަށާފައެވެ.

މި ފްރޭމްވޯކް އެއްބަސްވުމަކީ ފެނާއި ނަރުދަމާގެ ޚިދުމަތްތައް މެދުނުކެނޑި، އިތުބާރު ހުރި ގޮތެއްގައި ފޯރުކޮށްދިނުމަށް އިސްކަންދީގެން، ހަރުދަނާ އަދި ދެފުށް ފެންނަ ނިޒާމެއްގެ ދަށުން ޚިދުމަތްތައް ބަދަލުކުރުމަށްޓަކައި އެކުލަވާލާފައިވާ އެއްބަސްވުމެކެވެ.

މި ބަދަލުގެ ދަށުން، ކަމާގުޅޭ އޮޕަރޭޝަންތަކާއި، އިންފްރާސްޓްރަކްޗަރާއި ވަސީލަތްތަކުގެ އިތުރުން، ހިނގަމުންދާ މަޝްރޫޢުތައް އެމްޑަބްލިއުއެސްސީއާ ހަވާލުކުރުމަށް ވަނީ ނިންމާފައެވެ. އަދި ކަސްޓަމަރުންގެ ރެކޯޑުތަކާއި، އެއްބަސްވުންތަކާއި، އިންވެންޓްރީ އަދި އެހެނިހެން ޒިންމާތައް، ކަނޑައެޅިފައިވާ އުސޫލުތަކުގެ ދަށުން ޔަގީންކުރުމަށްފަހު އެމްޑަބްލިޔުއެސްސީއާ ޙަވާލުކުރުމަށްވެސް ވަނީ ނިންމާފައެވެ.

އެމްޑަބްލިޔުއެސްސީން ބުނީ މި ބަދަލުގެ މަރުޙަލާގައި، އައްޑޫއާއި ފުވައްމުލަކު ސިޓީގެ ރައްޔިތުންނަށް ފޯރުކޮށްދޭ ފެނާއި ނަރުދަމާގެ ޚިދުމަތުގެ ފެންވަރު ހިފަހައްޓައި، ލިޔެކިޔުންތަކާއެކު ތަރުތީބުކޮށް ޚިދުމަތްތައް ޙަވާލުކުރުމުގެ މަސައްކަތުގައި އެމްޑަބްލިޔުއެސްސީއާއި ފެނަކަ ގުޅިގެން ގާތުން މަސައްކަތް ކުރަމުންދާނެކަމަށެވެ.

އެމްޑަބްލިޔުއެސްސީގެ މެނޭޖިން ޑިރެކްޓަރ ހުސައިން ފަޙުމީ ވިދާޅުވީ އަންނަ މަހުގެ 13ގެ ކުރިން މަސައްކަތްތައް ނިންމައި ފުވައްމުލަކާއި އައްޑޫގައި ފެނާއި ނަރުދަމާގެ ޚިދުމަތް ދޭން އެމްޑަބްލިޔުއެސްސީން ފަށާނެ ކަމަށެވެ.

ރާއްޖޭގެ ރަށްރަށަށް ފެނާއި ނަރުދަމާގެ ޚިދުމަތް ދެމުން އަންނަ ކުންފުނި، ފެނަކަ ކޯޕަރޭޝަން އުވާލައި ސްޓެލްކޯގެ ބެލުމުގެ ދަށަށް ރާއްޖޭގެ ހުރިހާ ރަށެއްގެ ކަރަންޓުގެ ޚިދުމަތް ދިނުން ބަދަލުކުރަން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވަނީ ނިންމަވާފައެވެ. އެއާއެކު މުޅި ރާއްޖޭގެ ކަރަންޓުގެ ޚިދުމަތާ ސްޓެލްކޯއިން ހަވާލުވާތީ އަލަށް ހަވާލުވާ ރަށްރަށުގެ ހާލަތު ދެނެގަތުމަށް ސާވޭއެއްގެ މަސައްކަތްވެސް ދާދި ފަހުން ވަނީ ފަށައިފައެވެ.