ބެކްލޮގުގައި ހުރި ހުރިހާ މައްސަލަތައް، އަންނަ އަހަރުގެ ނިޔަލަށް ބަލާ ނިންމުމަކީ އަމާޒު ކަމުގައި އުއްތަމަ ފަނޑިޔާރު އަލްއުސްތާޛު ޢަބްދުލްޣަނީ މުޙައްމަދު ވިދާޅުވެއްޖެއެވެ.އުއްތަމަ ފަނޑިޔާރު މިހެން ވިދާޅުވީ، އޭޝިއާގެ ޤައުމުތަކުގެ ކޯޓުތަކާގުޅޭ އިންސްޓިޓިއުޝަންގެ 7 ވަނަ ކޮންގްރެސްގައި ދެއްވި ތަޤުރީރުގައެވެ.

އެ ތަގުރީރުގައި އުއްތަމަ ފަނޑިޔާރުވަނީ ރާއްޖޭގައި މިހާރު ބަލަމުންދާ މައްސަލަތަކާ ގުޅޭ ބައެއް ތަފާސްހިސާބުތައް ޙިއްސާކުރައްވާ، ޚާއްސަކޮށް ނުނިމި ހުރި މައްސަލަތައް އަވަސްކުރުމަށް ހުރި އަމާޒުތަކުގެ މަޢުލޫމާތު ޙިއްސާކުރައްވާފައެވެ. އެގޮތުން ރާއްޖޭގައި ކޯޓުގައި އެކި މަރުހަލާތަކުގައި ބެކްލޮގް ނުވަތަ ނުނިމި ހުރި މައްސަލަތަކުގެ ގޮތުގައި 13،032 މައްސަލަ ބަލަމުންދާ ކަމަށާއި އޭގެތެރެއިން 585 ކޭސްއަކީ ނުނިމި، 5 އަހަރަށްވުރެ ގިނަވެފައިވާ މައްސަލަތައް ކަމަށް ވިދާޅުވިއެވެ.

މިއީ، ހުށައަޅާ މައްސަލަތަކުގެ ނިސްބަތުން ކުޑަ ޢަދަދެއް ނަމަވެސް، މީގެ ސަބަބުން ރާއްޖޭގެ އާބާދީގެ %3އަށް އަސަރުކުރާ ކަމަށާއި ކޯޓުތަކުގައި މައްސަލަ ބެލުމުގެ ނިޒާމު ހަރުދަނާ ކުރުމަށް ކުރަމުންދާ މަސައްކަތުގެ ދަށުން މިއަހަރުގެ ނިޔަލަށް މީގެތެރެއިން 6185 މައްސަލަ ނިންމުމަކީ، ޢަމާޒުކަމަށް އުއްތަމަ ފަނޑިޔާރު ވިދާޅުވިއެވެ. އަދި ބެކްލޮގުގައި ހުރި އެންމެހާ މައްސަލަތައް، އަންނަ އަހަރުގެ ނިޔަލަށް ބަލާ ނިންމުމަށް ވަނީ ޢަމާޒު ކަނޑައަޅާފައެވެ.

މި މަސައްކަތްތައް ކުރިއަށްދާއިރު، އަލަށް ހުށައެޅޭ މައްސަލަތައްވެސް އެކުއެކީ ބަލަމުންދާކަމަށް ވިދާޅުވިއެވެ. އަދި ކުރިއަށް އޮތްތާނުގައި މަސައްކަތްތައް ބައްޓަންކުރާނީ، މައްސަލަތައް ފުނި ނުޖެހި، ވީހާވެސް އަވަހަށް މައްސަލަތައް ބަލާ ނިންމޭނެ ގޮތަށް ކަމަށްވެސް ވިދާޅުވިއެވެ.

މި ކޮންގްރެސްގައި އެސޯސިއޭޝަން އޮފް އޭޝިއަން ކޮންސްޓިޓިއުޝަނަލް ކޯޓްސް އެންޑް އިކުއިވަލަންޓް އިންސްޓިޓިއުޝަންސްގެ މެމްބަރު 18 ޤައުމަކުން އެޤައުމުގެ އެންމެ މަތީ ކޯޓުތަކުގެ އިސްވެރިން ބައިވެރިވެ ވަޑައިންނެވިއެވެ.