މޯލްޑިވްސް ޑިމޮކްރެޓިކް ޕާޓީ (އެމްޑީޕީ) އިން އެ ޕާޓީގެ ރަސްމީ މޮބައިލް އެޕްލިކޭޝަން "ޔެލޯ" ރަސްމީކޮށް ލޯންޗުކޮށްފައެވެ.

މި އެޕްލިކޭޝަން ލޯންޗުކުރީ އެޕާޓީގެ 5 ވަނަ ކޮންގްރެސްގެ ތެރެއިންނެވެ.

މި އެޕްލިކޭޝަންގެ މައިގަނޑު މަގުސަދަކީ ޕާޓީގެ އިދާރީ ކަންކަން ފަސޭހަކުރުމާއި، ޕާޓީގެ މެމްބަރުންނަށް ޚިދުމަތްދިނުން އިތުރަށް ހަރުދަނާކޮށް، ޕާޓީއާ މެމްބަރުންނާ ދެމެދު އޮންނަ ގުޅުން އިތުރަށް ބަދަހިކުރުމެވެ. އެޕްސްޓޯރ މެދުވެރިކޮށް މި އެޕްލިކޭޝަން މިހާރު ޑައުންލޯޑު ކުރެވޭނެއެވެ.

"ޔެލޯ" އެޕްލިކޭޝަންގެ ސަބަބުން، ޕާޓީގެ އެންމެ ފަހުގެ ޚަބަރުތަކާއި، ކުރިއަށް ރޭވިފައިވާ ހަރަކާތްތަކުގެ މައުލޫމާތު ވަގުތުން ބަލާލުމުގެ ފުރުސަތު މެމްބަރުންނަށް ލިބިގެންދާނެއެވެ. މީގެ އިތުރުން، އެޕްލިކޭޝަންގެ ތެރޭގައި ހާއްސަ ޗެޓް ފީޗާރއެއް ހިމެނޭއިރު، މީގެ ސަބަބުން ޕާޓީގެ މެމްބަރުންނާއި ޕާޓީގެ ގޮފިތަކާ ގުޅުވައިދިނުމަށް ވަރަށް ބޮޑު މަދަދެއް ލިބިގެންދާނެއެވެ. ޕާޓީގެ އިދާރީ ހުރިހާ ކަމެއް ފަސޭހަކުރުމަށް މި އެޕްލިކޭޝަނަކީ ވަރަށް މުހިންމު ދޮރެއްކަމަށް ޕާޓީން ފާހަގަކުރެއެވެ.

މިކަމާގުޅިގެން އެމްޑީޕީގެ ނައިބު ރައީސް އިބްރާހިމް ވަހީދު ވިދާޅުވީ މި އެޕްލިކޭޝަނަކީ ޕާޓީގެ އިދާރީ ކަންކަން ފުރިހަމަކުރުމަށް ކުރެވުނު މުހިންމު މަސައްކަތެއް ކަމަށާއި އެއީ ޕާޓީއާއި މެމްބަރުންނާ ދެމެދު އޮތް ގުޅުން އިތުރަށް ވަރުގަދަކޮށް، މެމްބަރުންނަށް ޕާޓީގެ މަސައްކަތްތަކުގައި ބައިވެރިވުމުގެ ފަސޭހަ މަގެއް ހުޅުވައިދިން މުހިންމު ދޮރެއް ކަމަށެވެ. އަދި އެޕް މެދުވެރިކޮށް ޕާޓީގެ ހުރިހާ މެމްބަރުންނަށް ފަސޭހަކަމާއެކު ޕާޓީގެ ގޮފިތަކާއި ވަކިވަކި މެމްބަރުންނާވެސް މަޝްވަރާކުރެވޭނެކަމަށް ވިދާޅުވިއެވެ.

މީގެ އިތުރުން، "ޔެލޯ" އެޕްލިކޭޝަންގެ ތެރޭގައި ޕާޓީގެ ހުރިހާ މެމްބަރުންނަށް ހުޅުވާލެވިފައިވާ ސޯޝަލް މީޑިއާ ޕްލެޓްފޯމެއް ވެސް ހިމެނޭނެ ކަމަށާއި މިހާރުވެސް 1100 މެމްބަރުން މި އެޕްލިކޭޝަން ބޭނުންކުރަމުންދާ ކަމަށް އެމްޑީޕީން ބުނެއެވެ. އަދި މުސްތަގުބަލުގައި ޕާޓީގެ ވީހާވެސް ގިނަ މެމްބަރުން މި އެޕް ބޭނުންކުރުމަކީ ޕާޓީގެ އެދުމެއް ކަމަށް ވެސް ވަނީ ބުނެފައެވެ.