އަރިއަތޮޅު އުތުރުބުރީ ބޮޑުފޮޅުދޫ ކައުންސިލުން ދިރިއުޅުމަށްޓަކައި ދޫކުރާ ބަންޑާރަ ގޯއްޗަށް އެދޭ ފޯމަށް ބައެއް އިސްލާހުތައް ގެނެސް، އަލުން ފޯމު ދޫކުރުމާއި ބަލައިގަތުމުގެ މަސައްކަތް ކުރިއަށް ގެންދަން ނިންމައިފިއެވެ.

ބޮޑުފޮޅުދޫ ކައުންސިލުން ނެރެފައިވާ އިޢުލާނެއްގައިވާ ގޮތުން، އެ ކައުންސިލްގެ ނަންބަރު: (IUL)-343/343/2026/62 އިޢުލާންއާއެކު ކުރިން ގެޒެޓްކުރެވިފައިވާ "ދިރިއުޅުމަށްޓަކައި ދޫކުރާ ބަންޑާރަ ގޯއްޗަށް އެދޭ ފޯމް" ގައި ބައެއް މައްސަލަތައް ފާހަގަކުރެވިފައިވާތީ، އެ ފޯމު އިސްލާހުކޮށް އަލުން ވަނީ ގެޒެޓްކުރެވިފައެވެ.

އިސްލާހުކުރި ފޯމު ދޫކުރަން ފަށާނީ 2026 ވަނަ އަހަރުގެ އޮކްޓޫބަރު މަހުގެ 4 ވާ އާދިއްތަ ދުވަހުން ފެށިގެންނެވެ. ފޯމުތައް ދޫކުރާނީ ބޮޑުފޮޅުދޫ ކައުންސިލްގެ އިދާރާގެ ކައުންޓަރުންނާއި، ދިވެހި ސަރުކާރުގެ ގެޒެޓުން ޑައުންލޯޑް ކުރެވޭނެއެވެ. ކައުންޓަރުން ދޫކުރާ ފޯމެއްގެ އަގަކީ 25 ރުފިޔާއެވެ. ފޯމު ދޫކުރުން އޮންނާނީ ރަސްމީ ބަންދު ނޫން ކޮންމެ ދުވަހެއްގެ 13:00 އިން 14:00 އަށެވެ.

ގޯއްޗަށް އެދޭ ފޯމު ބަލައިގަތުން އޮންނާނީ 2026 ވަނަ އަހަރުގެ އޮކްޓޫބަރު މަހުގެ 1 ވާ އާދިއްތަ ދުވަހުން ފެށިގެން، ނޮވެމްބަރު މަހުގެ 1 ވާ އާދިއްތަ ދުވަހުގެ 14:00 ގެ ނިޔަލަށެވެ. ފޯމުތައް ބަލައިގަންނާނީ އއ. ބޮޑުފޮޅުދޫ ކައުންސިލްގެ އިދާރާއިންނެވެ. ފޯމު ބަލައިގަތުމަށް ހަމަޖައްސާފައިވާ ވަގުތަކީ ރަސްމީ ބަންދު ނޫން ކޮންމެ ދުވަހެއްގެ 13:00 އިން 14:00 އަށެވެ.

އއ. ބޮޑުފޮޅުދޫ ކައުންސިލްގެ 5 ވަނަ ދައުރުގެ 18 ވަނަ އާއްމު ޖަލްސާ، 2026 ވަނަ އަހަރުގެ ސެޕްޓެމްބަރު މަހުގެ 24 ގައި ބޭއްވުނުއިރު، އއ.ބޮޑުފޮޅުދޫ ލޭންޑްޔޫޒް ޕްލޭންއާއި އެއްގޮތަށް "އަރިއަތޮޅު އުތުރުބުރީ ބޮޑުފޮޅުދޫއިން ދިރިއުޅުމަށްޓަކައި ބަންޑާރަ ގޯތި ދޫކުރުމުގެ އުސޫލު" ފާސްކޮށްފައިވެއެވެ.

މި އުސޫލުގެ ދަށުން، ރަށުގެ ޗާޓްގައި ފާހަގަކޮށްފައިވާ ހިއްކި ބިމުގައި ދިރިއުޅުމަށްޓަކައި ދޫކުރުމަށް ކަނޑައަޅާފައިވާ 1200 އަކަފޫޓުގެ 200 ގެވަޅު އޮތް ސަރަހައްދުން ގޯތި ދޫކުރުމަށް ވަނީ ނިންމާފައެވެ. ގޯއްޗަށް އެދި ފޯމު ހުށަހެޅުމުގެ ފުރުސަތު، އާއްމުކޮށް ހުޅުވާލާފައިވާއިރު، ފުރުސަތު ހުޅުވާލާފައިވަނީ "އަރިއަތޮޅު އުތުރުބުރީ ބޮޑުފޮޅުދޫއިން ދިރިއުޅުމަށްޓަކައި ބަންޑާރަ ގޯތި ދޫކުރުމުގެ އުސޫލު" ގެ 11 ވަނަ މާއްދާގައިވާ ޝަރުތުތައް ފުރިހަމަވާ ފަރާތްތަކަށެވެ.