މިއަހަރު ރާއްޖެ އައި ފަތުރުވެރިންގެ އަދަދު 1.6 މިލިޔަން ހުރަސްކޮށްފިއެވެ.

ސަރުކާރުން މިއަހަރަށް ކަނޑައެޅި ފަތުރުވެރިކަމުގެ އަމާޒަކީ، 2.5 މިލިޔަން ފަތުރުވެރިން ރާއްޖެއަށް ގެނައުމެވެ. އެއީ މިދިޔަ އަހަރު ހާސިލުކުރި 2 މިލިޔަން ފަތިރުވެރިންގެ ޓާގެޓަށްވުރެ 0.5 އިތުރު އަދަދެކެވެ.

މެދު އިރުމަތީގެ ހަނގުރާމަތަކާ ގުޅިގެން ދުނިޔޭގެ ވައިގެ ދަތުރުފަތުރަށް އައި ލޮޅުމުގެ އަސަރު ރާއްޖޭގެ ފަތުރުވެރިކަމަށްވެސް ވަނީ ކޮށްފައެވެ. ނަމަވެސް ރާއްޖެއިން އިންޑަސްޓްރިއާއެކު ގުޅިގެން ކުރި މަސައްކަތްތަކުގެ ނަތީޖާ ވަރަށް ރަނގަޅު ކަމަށާއި، އެގޭ ކާމިޔާބީ އަހަރުގެ ފަހު ކުއާޓަރުގައި ބޮޑުތަނުން ރަނގަޅުވާނެކަމަށް ޤަބޫލުކުރެވޭކަމަށް ފަތުރުވެރިކަމާ ބެހޭ ވަޒީރު މުޙައްމަދު އަމީން ވަނީ ވިދާޅުވެފައެވެ.

ރާއްޖޭގެ ފަތުރުވެރިކަމުގެ ލިސްޓުގައި އެންމެ ކުރީގައި އޮތީ ޗައިނާއެވެ.

ފަތުރުވެރިކަމާ ބެހޭ ވުޒާރާގެ ތަފާސްހިސާބުތައް ދައްކާގޮތުން އަހަރުގެ މިހާތަނަށް ޗައިނާއިން ރާއްޖެއަށް 300،977 ފަތުރުވެރިން ވަނީ ޒިޔާރަތްކޮށްފައެވެ. އެ އަދަދަކީ މިދިޔަ އަހަރުގެ މި މުއްދަތުގައި ޗައިނާއިން ރާއްޖެއައި ފަތުރުވެރިންނާއި އަޅާބަލާއިރު %14 އިތުރު އަދަދެކެވެ. މިދިޔަ އަހަރުގެ މި މުއްދަތުގައި ރާއްޖެ އައިސްފައިވަނީ 263,599 ފަތުރުވެރިންނެވެ.

ޗައިނާއަކީ ރާއްޖެއަށް އެންމެ ގިނަ އަދަދަކަށް ފަތުރުވެރިން ޒިޔާރަތްކުރާ ގައުމެވެ. މިދިޔަ އަހަރުތެރޭ އެގައުމުން ރާއްޖެއަށް 329,428 ފަތުރުވެރިން ޒިޔާރަތްކޮށްފައިވެއެވެ.

ޗައިނާ ފިޔަވައި ދެން ރާއްޖެއަށް އެންމެ ގިނަ ފަތުރުވެރިން އައިސްފައިވަނީ ރަޝިއާއިންނެވެ. އެއީ 229,236 ފަތުރުވެރިންނެވެ. 3ވަނަ އަށް އެންމެ ގިނަ ފަތުރުވެރިން އައިސްފައިވަނީ އިނގިރޭސިވިލާތުންނެވެ. އެއީ 119,968 ފަތުރުވެރިންނެވެ.

ފަތުވެރިކަމާ ބެހޭ ވުޒާރާގެ ތަފާސްހިސާބުތައް ދައްކާގޮތުން ސެޕްޓެންބަރު މަހު ރާއްޖެއަށް 150,764 ފަތުރުވެރިން އައިސްފައިވެއެވެ.