ދިވެހިރާއްޖޭގެ ޒުވާނުން ބާރުވެރިކުރުވުމާއި، ކުޅިވަރާއި ހަށިހެޔޮކަމާ ބެހޭ ވަޒީރު ޢަބްދުالله ރާފިއު، އިސްލާމިކް ކޯޕަރޭޝަން ޔޫތު ފޯރަމް (އައިސީވައިއެފް) ގެ ރައީސް ތާހާ އައިހާންއާ ބައްދަލުކުރައްވައި ރަސްމީ މަޝްވަރާތަކެއް ބާއްވަވައިފިއެވެ.

މި ބައްދަލުކުރެއްވުމުގައި މައިގަނޑު ގޮތެއްގައި މަޝްވަރާކުރައްވާފައިވަނީ އައިސީވައިއެފްއާ ގުޅިގެން ރާއްޖޭގައި ޒުވާނުންނަށް ޚާއްޞަ ޕްރޮގްރާމްތަކެއް ހިންގުމާ ގުޅޭގޮތުންނެވެ.

އަދި ބައިނަލްއަޤްވާމީ ޕްރޮގްރާމްތަކުގައި ދިވެހި ޒުވާނުން ބައިވެރިވެ، އައު ކަންކަން ދަސްކޮށް، ދުނިޔޭގެ އެކި ކަންކޮޅުތަކުގެ ޒުވާނުންނާ ގުޅުން ބަދަހިކުރުމަށް އިތުރު ފުރުޞަތުތައް ފަހިކޮށްދިނުމާ ބެހޭގޮތުންވެސް ފުޅާ ދާއިރާއެއްގައި ވަނީ ޚިޔާލު ބަދަލުކުރައްވާފައެވެ.

މި ބައްދަލުކުރެއްވުމުގައި އައިސީވައިއެފްގެ ރައީސް ތާހާ އައިހާން ވަނީ ރާއްޖެއާއެކު މިފަދަ ގުޅުމެއް ޤާއިމުކުރުމަށް ފުރިހަމައަށް ތާއީދުކުރައްވާކަން ހާމަކުރައްވާފައެވެ. އަދި ދިވެހި ޒުވާނުންނަށް އަމާޒުކޮށްގެން އެކި ކަހަލަ ޕްރޮގްރާމްތައް ރާވައި ހިންގުމަށް އައިސީވައިއެފްގެ ފަރާތުން މަސައްކަތްކޮށްދެއްވާނެ ކަމުގެ ފުރިހަމަ ޔަޤީންކަން އެމަނިކުފާނު ވަނީ ދެއްވާފައެވެ.

މީގެއިތުރުން، އައިސީވައިއެފްގެ އެންމެ މުހިންމު އެއް އަމާޒަކީ ޒުވާނުންނަށް އައު ފުރުޞަތުތައް އުފައްދައި، އެ ފުރުޞަތުތައް ހިއްސާކުރުންކަން ފާހަގަކުރައްވަމުން، ރައީސް ތާހާ އައިހާން ވަނީ ދިވެހިރާއްޖެއާއި އައިސީވައިއެފްއާ ދެމެދު އޮތް ގުޅުން ކުރިއަށް އޮތް ތަނުގައި އިތުރަށް ބަދަހިވެގެންދާނެ ކަމަށް ވިދާޅުވެފައެވެ.