ޑިމޮކްރެޓިކް ރިޕަބްލިކް އޮފް ކޮންގޯ (ޑީއާރްސީ) ގައި ހަލުވިކަމާއެކު ފެތުރެމުންދާ އެބޯލާ ރޯގާގައި މަރުވި މީހުންގެ ޢަދަދު 4،000 އިން މައްޗަށް އަރައިފި އެވެ.

ކޮންގޯގެ ކަމާބެހޭ އިދާރާތަކުން ހާމަކުރި އެންމެ ފަހުގެ ހިސާބުތައް ދައްކާ ގޮތުގައި، މި ބަލީގައި މަރުވި މީހުންގެ ޢަދަދު މިހާރު ވަނީ 4،018 އަށް އަރާފައެވެ.

އަދި ޤައުމުގެ ހަތް ޕްރޮވިންސަކުން ބަލި ޖެހުނު މީހުންގެ ޢަދަދު 8،300 އަށް އަރާފައިވާއިރު، މި ރޯގާ ކޮންޓްރޯލް ކުރުމަށް ސަރުކާރުން ކުރަމުންދާ މަސައްކަތްތަކަށް ވަނީ ބޮޑެތި ގޮންޖެހުންތަކާ ކުރިމަތިލާން ޖެހިފައެވެ.

ނަމަވެސް، މި ބަލި ޖެހުނު މީހުންގެ ތެރެއިން 2،000 އަށްވުރެ ގިނަ މީހުން މިހާތަނަށް ފަރުވާއަށްފަހު ރަނގަޅުވެފައިވާ ކަމަށްވެސް ރިޕޯޓުތައް ބުނެއެވެ.

އިރުމަތީ ކޮންގޯގެ ދަތުރުފަތުރުގެ ދަތިކަމާއި، ވަސީލަތްތައް މަދުވުމުގެ އިތުރުން ސައުތު ސޫދާން، ޔުގެންޑާ އަދި ރުވާންޑާގެ ބޯޑަރު ކައިރީގައި ހަރަކާތްތެރިވާ ހަތިޔާރުއެޅި ޖަމާޢަތްތަކުގެ ހަމަނުޖެހުންތަކުގެ ސަބަބުން ބަލިޖެހޭ މީހުންނަށް އަވަސް ފަރުވާ ދިނުމަށް ވަނީ ބޮޑެތި ހުރަސްތަކެއް އެޅިފައެވެ.

މީގެއިތުރުން، އީޓޫރީ ޕްރޮވިންސްގެ ވެރިރަށް ބޫނިއާ ކައިރީގައި ހަތިޔާރު ހޯދުމުގެ ތެރޭގައި ސިފައިން ހިންގި ހަރަކާތެއްގައި އެބޯލާއަށް ފަރުވާދޭ މައި މަރުކަޒަކާއި ކޭމްޕެއްގައި އަލިފާން ރޯކޮށްލުމާ ގުޅިގެން، އެތަނުގައި ތިބި 19،000 އަށްވުރެ ގިނަ މީހުން ވަނީ ރައްކާތެރިކަން ހޯދުމަށް ފިލައިގެން ގޮސްފައެވެ.

މި ހާދިސާގެ ސަބަބުން ބަލި ކޮންޓްރޯލް ކުރުމުގެ މަސައްކަތަށް އިތުރު ލޮޅުމެއް އަރާފައިވާ ކަމަށް އދ. އިން ވަނީ ބުނެފައެވެ.

ހަމައެއާއެކު، ޞިއްޙީ ޚިދުމަތްތެރިންނަށާއި ކަމާބެހޭ އިދާރާތަކަށް ޢާންމުންގެ އިތުބާރު ކުޑަވުމަކީވެސް ރޯގާ ފެތުރުން ހުއްޓުވުމަށް އެޅިފައިވާ ބޮޑު ހުރަހެކެވެ. ދުނިޔޭގެ ޞިއްޙަތު ޖަމްޢިއްޔާ (ޑަބްލިއުއެޗްއޯ) އިން އިންޒާރު ދީފައިވާ ގޮތުގައި، މި ރޯގާ އަދިވެސް ކޮންޓްރޯލް ކުރެވިފައި ނުވާއިރު، މިއީ 2014 އިން 2016 އަށް ހުޅަނގު އެފްރިކާގައި 11،000 އަށްވުރެ ގިނަ މީހުން މަރުވި އެބޯލާ ވަބާއަށްވުރެވެސް ނުރައްކާތެރި ހާލަތަކަށް ދިއުމުގެ ފުރުޞަތު އޮތް ކަމެކެވެ.