ދުނިޔޭގެ މަޤްބޫލު ކެއްކުމުގެ ޝޯވއެއް ކަމަށްވާ "މާސްޓަރޝެފް" ގެ ސްރީލަންކާ ފްރެންޗައިޒުން ރާއްޖޭގައި ޝޫޓްކޮށްފައިވާ ޚާއްޞަ "މޯލްޑިވްސް އެޕިސޯޑް" 2026 އޮކްޓޫބަރު 3 ވާ ހޮނިހިރު ދުވަހުގެ ރޭ 10:00 ގައި ޓީވީއެމުން ދެއްކުމަށް ހަމަޖެހިއްޖެއެވެ.

ދިވެހިރާއްޖޭގެ ޤުދުރަތީ ރީތިކަމާއި، މުއްސަނދި ކެއުންތަކާއި ސަޤާފަތް އަދި ދިވެހީންގެ މެހެމާންދާރީ ދައްކުވައިދޭ މި ޚާއްޞަ އެޕިސޯޑަކީ މޯލްޑިވްސް ހޮލިޑޭ ކަލެކްޝަންސް (އެމްއެޗްސީ ގްރޫޕް) އަދި އޮފިޝަލް ޑެސްޓިނޭޝަން ޕާޓްނަރުގެ ގޮތުގައި ވިޒިޓް މޯލްޑިވްސް ކޯޕަރޭޝަން (ވީއެމްސީ) ގުޅިގެން ގެނެސްދޭ ޕްރޮޑަކްޝަނެކެވެ.

މި އެޕިސޯޑުގައި މާސްޓަރޝެފް ސްރީލަންކާގެ ފަނޑިޔާރުންނާއި، ހޯސްޓް އަދި ބައިވެރިން ރާއްޖޭގެ ހިތްގައިމު ރަށްތަކުގެ މާޙައުލުގައި ދިވެހި ރަހަތައް ބޭނުންކޮށްގެން ކެއްކުމުގެ ވާދަވެރި ޗެލެންޖެއް ކުރިއަށް ގެންދާނެއެވެ.

މި ޕާޓްނަރޝިޕާ ގުޅޭގޮތުން ވިޒިޓް މޯލްޑިވްސް ކޯޕަރޭޝަންގެ ސީއީއޯ އަދި މެނޭޖިންގ ޑިރެކްޓަރ ޢަބްދުالله ޔާސިރު ވިދާޅުވީ، ރާއްޖެއަކީ ހިތްގައިމު ގޮނޑުދޮށްތަކަށާއި މޫދު އަދި މެހެމާންދާރީއަށް މަޝްހޫރު ޤައުމެއް ކަމުގައި ވިޔަސް، ދިވެހި ކެއުންތަކަކީވެސް ރާއްޖެ އިޝްތިހާރުކުރުމަށް ލިބޭ ވަރަށް މުހިންމު ވަސީލަތެއް ކަމަށެވެ. އަދި މާސްޓަރޝެފް ފަދަ މަޤްބޫލު ޕްލެޓްފޯމެއް މެދުވެރިކޮށް ދިވެހި ރަހަތަކާއި ސަޤާފަތް ސަރަޙައްދީ ފެންވަރުގައި ދައްކާލެވުމަކީ ރާއްޖެއަށް ލިބުނު ބޮޑު ފުރުޞަތެއް ކަމަށް އޭނާ ފާހަގަކުރެއްވިއެވެ.

މާސްޓަރޝެފް ސްރީލަންކާގެ މި ބޮޑު ޕްރޮޑަކްޝަން ރާއްޖޭގައި ނެގުމަށްޓަކައި ބޭރުގެ ފަނޑިޔާރުންނާއި ބައިވެރިން އަދި ޓެކްނިކަލް ކުރޫން ހިމެނޭ ބޮޑު ޓީމެއް ވަނީ ރާއްޖެ އައިސްފައެވެ. އެމްއެޗްސީ ގްރޫޕުން ވަނީ ދަތުރުފަތުރާއި ހުރުމުގެ އިންތިޒާމުތަކުގެ އިތުރުން، އައުޓްޑޯ މާޙައުލެއްގައި ވަކިވަކި ކުކިންގ ސްޓޭޝަންތަކާއި ބަދިގެތައް އެޅުމުގެ ބުރަ މަސައްކަތްތައް ކޮށްފައެވެ. އަދި ވީއެމްސީން ވަނީ ކަމާބެހޭ ސަރުކާރުގެ އިދާރާތަކާ ގުޅިގެން ވިސާއާއި ޝޫޓިންގ ހުއްދަތައް ފަސޭހަކަމާއެކު ހަމަޖައްސައިދީފައެވެ.

މި ޕްރޮޑަކްޝަން ކުރިއަށް ގެންގޮސްފައިވަނީ ނެސްލޭ ޕްރޮފެޝަނަލް، މެގީ، ނެސްކެފޭ، މައިލޯ، އަދި ލިލީ އިންޓަނޭޝަނަލްގެ އެހީތެރިކަމާއެކުގައެވެ. މީގެއިތުރުން، ކްރޮސްރޯޑްސް މޯލްޑިވްސް، ދަ މެރީނާ، ސައީ ލެގޫން މޯލްޑިވްސް، ހާޑް ރޮކް ހޮޓެލް މޯލްޑިވްސް، އަދި އެސްއޯ/ މޯލްޑިވްސް ހޮސްޕިޓާލިޓީ ޕާޓްނަރުންގެ ގޮތުގައި ހަމަޖައްސާފައިވާއިރު، އޮފިޝަލް ބްރޯޑްކާސްޓިންގ ޕާޓްނަރަކީ ޕަބްލިކް ސަރވިސް މީޑިއާ (ޕީއެސްއެމް) އެވެ.