މާދަމާ ޕްރިމިއަރ ކުރުމަށް ތައްޔާރުވެފައިވާ އަޒްހާން އިބްރާހިމް ގެ އާ ސީރީޒް "ޖުންޖުލާ" ގެ ވަރަށް ހިތްގައިމު ލަވައެއް ކަމަށްވާ "ހުވަފެނީ ތަސްވީރު" މިރޭ ކްރިއޭޓިވް ނެޓްވޯކްގެ ޔޫޓިއުބް ޗެނަލްގައި ރިލީޒްކޮށްފިއެވެ.

"ލައްކަ ގިނަ ކުލަ ރީތި ޖެހޭޔޭ ހުވަފެނީ ތަސްވީރުގާ" މި ކަނޑިން ސިފަކޮށްދޭ ފަދައިން، މި ލަވައިގެ ވީޑިއޯއިން ފެނިގެންދަނީ ހަމަ ހަގީގަތުގައިވެސް ހުވަފެނީ، ކުލަގަދަ އަދި އެހާމެ ފުރިހަމަ މަންޒަރުތަކެކެވެ.

ލަވައިގެ ވީޑިއޯއިން ފެނިގެންދަނީ މަޝްހޫރު ތަރިން ކަމަށްވާ ވާޝިޔާ އަދި އިޝްފާން އެވެ. މި ދެ ތަރިންގެ ފަރި ހަރަކާތްތަކާއެކު، ލާމު އަތޮޅުގެ ޤުދުރަތީ ރީތިކަމާއި ފަރުކޮޅުފުށީގެ ހިތްގައިމު މަންޒަރުތައް މި ލަވައިގެ ޑައިރެކްޓަރ އަދި ކޮރިއޯގްރާފަރ އަޒްހާން ވަނީ ވަރަށް ފުރިހަމައަށް ގެނެސްދީފައެވެ.

މާއިން އަދި ނަސޫޙްގެ ޖާދުވީ އަޑުން ކިޔާފައިވާ މި ލަވައިގެ މިއުޒިކް ތައްޔާރުކޮށްދީފައިވަނީ ހުސައިން ތައުފީޤް އެވެ. އަދި ލަވައިގެ މާނަފުން ޅެން ހަދާފައިވަނީ ކުޅަދާނަ ޅެންވެރިޔާ އީސާ ޝަރީފް އެވެ. ލަވައިން ފެންނަ ތަރިންގެ ފުރިހަމަ ކޮސްޓިއުމްތައް އައްމު ފަރުމާކޮށްދީފައިވާއިރު، މޭކަޕް އަދި ހެއަރ ސްޓަލައިންގ ގެ މަސައްކަތްތައް ކޮށްފައިވަނީ ޖަސްޓިން އެވެ.

މާދަމާ "ޖުންޖުލާ" ސީރީޒް ބެލުންތެރިންނާ ހަމައަށް އަންނަން ތައްޔާރުވެފައިވާއިރު، މިރޭ ނެރުނު މި ލަވައިން މި ވަނީ ސީރީޒްއަށް ކުރެވޭ އިންތިޒާރު އިތުރަށް ބޮޑުވެ، ބެލުންތެރިންގެ ހިތްތައް އަތުލާފައެވެ.