ސަރުކާރުގެ ވުޒާރާތަކުން ކުރަމުން އަންނަ މަސައްކަތްތަކާ ބެހޭ މަޢުލޫމާތު ރައްޔިތުންނާ ޙިއްޞާކޮށް، ޢާންމުންގެ ސުވާލުތަކަށް ޖަވާބުދިނުމަށް ބާއްވާ "އަހާ" ފޯރަމްގެ 8 ވަނަ ފޯރަމް އަންނަ އާދިއްތަ ދުވަހުގެ ރޭ ބޭއްވުމަށް ހަމަޖެހިއްޖެއެވެ.

ރައްޔިތުންނާ ވީހާވެސް ގާތުން މަޢުލޫމާތު ޙިއްޞާކުރުމަށްޓަކައި ރައީސުލްޖުމްހޫރިއްޔާގެ އޮފީހާއި ޕީއެސްއެމް ގުޅިގެން "އަހާ" ސިލްސިލާ ފޯރަމްތައް ރަސްމީކޮށް ފަށާފައިވަނީ 2024 ވަނަ އަހަރުގެ ޖަނަވަރީ މަހުގެ ތެރޭގައެވެ.

މިއީ ސަރުކާރުގެ އެކި ވުޒާރާތަކާއި މުއައްސަސާތަކުގެ މަސައްކަތްތައް ވީހާވެސް ތަފްޞީލުކޮށް ރައްޔިތުންނަށް އޮޅުންފިލުވައިދިނުމަށާއި، ދައުލަތުގެ ކަންކަމުގައި ދެފުށް ފެންނަ މިންވަރު އިތުރުކުރުމަށްޓަކައި ރައީސުލްޖުމްހޫރިއްޔާގެ އޮފީހާއި ޕަބްލިކް ސަރވިސް މީޑިއާ (ޕީއެސްއެމް) ގުޅިގެން ސިލްސިލާކޮށް ކުރިއަށްގެންދާ ފޯރަމެކެވެ.

މި ފޯރަމަކީ ސަރުކާރުގެ ސިޔާސަތުތަކާއި ހިންގާ މަޝްރޫޢުތަކާ ގުޅޭގޮތުން އެ ދާއިރާތަކުގެ އެންމެ އިސް ވެރިންނާ ސީދާ ސުވާލުކޮށް، ރައްޔިތުންގެ ޝަކުވާތަކާއި ކަންބޮޑުވުންތަކަށް ސީދާ ޖަވާބު ހޯދުމަށް ފަހިކޮށްދީފައިވާ މުހިންމު ފުރުޞަތެކެވެ.

އާދިއްތަ ދުވަހުގެ ރޭ 21:00 ގައި ފެށުމަށް ހަމަޖެހިފައިވާ މި ފޯރަމްގައި ބައިވެރިވެވަޑައިގަންނަވާނީ:

• އިޤްތިޞާދީ ތަރައްޤީއާއި ދަތުރުފަތުރާ ވިޔަފާރިއާ ބެހޭ ވަޒީރު މުޙައްމަދު ސަޢީދު
• ދިފާޢީ އަދި ވަޠަނީ ޚިދުމަތާ ބެހޭ ވަޒީރު ޙަސަން ރަޝީދު
• ބަންޑާރަނައިބު އަލްއުސްތާޛު އަޙްމަދު އުޝާމް

ޖުމްލަ ދެ ގަޑިއިރަށް ކުރިއަށްދާ މި ފޯރަމުގައި ބައިވެރިވެ، ވަޒީރުންނާ ކުރަން ބޭނުންވާ ސުވާލުތައް ފޮނުވުމުގެ ފުރުޞަތު މިހާރު ވަނީ ޢާންމުންނަށް ހުޅުވާލާފައެވެ. އެގޮތުން، ފޯރަމް ކުރިއަށްދާ މާލަމަށް ޙާޟިރުވެ ސީދާ ސުވާލުކުރުމުގެ އިތުރުން، ފޯރަމް ކުރިއަށްދާ ވަގުތު ސޯޝަލް މީޑިއާ ޕްލެޓްފޯމްތައް ކަމަށްވާ ފޭސްބުކް، އެކްސް އަދި ޕީއެސްއެމްގެ އެއަރ އެޕް މެދުވެރިކޮށްވެސް ވަޒީރުންނަށް ސުވާލު ފޮނުވުމުގެ ފުރުޞަތު ވަނީ ތަނަވަސްކޮށްދީފައެވެ.