ވަޒީރުންގެ "އަހާ" ފޯރަމް މިރޭ އޮންނާނެއެވެ.

މިއީ ސަރުކާރުގެ ވުޒާރާތަކުން ކުރަމުން އަންނަ މަސައްކަތްތަކުގެ އަދާހަމަ ހިއްސާކުރުމަށާއި، ވަޒީރުންނާއި ރައްޔިތުން ކުރަން ބޭނުންވާ ސުވާލުތަކަށް ޖަވާބުދެއްވުމަށް ބާއްވާ ފޯރަމެކެވެ.

ސަރުކާރުގެ އެކި ވުޒާރާތަކުގެ މަސައްކަތްތަކުގެ މަޢުލޫމާތު އާންމުންނާ ހަމައަށް ގެނެސްދިނުމަށް ރައީސުލްޖުމްހޫރިއްޔާގެ އޮފީހާއި ޕީއެސްއެމް ގުޅިގެން ގެނެސްދޭ މި ފޯރަމްގައި މިރޭ ވެސް 3 ވަޒީރުން ބައިވެރިވެވަޑައިގަންނަވާގޮތަށް ވަނީ ހަމަޖެހިފައެވެ. އެގޮތުން ޒުވާނުން ބާރުވެރިކުރުވުމާއި ކުޅިވަރާއި ހަށިހެޔޮކަމާ ބެހޭ ވަޒީރު ޢަބްދުﷲ ރާފިޢު، މަސްވެރިކަމާއި ދަނޑުވެރިކަމާއި ކަނޑުގެ ވަސީލަތްތަކާ ބެހޭ ވަޒީރު އަޙްމަދު ޝިޔާމް އަދި ދާޚިލީ ސަލާމަތާއި މަސައްކަތްތެރިކަމާއި ފަންނިއްޔާތާ ބެހޭ ވަޒީރު ޢަލީ އިޙްސާން ބައިވެެރިވަޑައިގަތުމަށް ވަނީ ނިންމަވާފައެވެ.

މިރޭ 21:00 ގައި ފެށުމަށް ނިންމާފައިވާ މި ފޯރަމް ގާތްގަޑަކަށް ދެ ގަޑިއިރަށް ކުރިއަށްދާއިރު، ފޯރަމްގައި ބަައިވެރިވެވަޑައިގަންނަވާ ވަޒީރުންނާ ސުވާލު ކުރުމުގެ ފުރުސަތު ވަނީ އާންމުކޮށް ހުޅުވާޅާފައެވެ. އެގޮތުން ފޯރަމް އޮންނަ ތަނަށް ގޮސް ސުވާލުކުރުމުގެ ފުރުސަތާއި ޕީއެސްއެމް އެއަރ އެޕް މެދުވެރިކޮށް ސުވާލު ފޮނުވުމުގެ ފުރުސަތު ވެސް ހުޅުވާލާފައި ވެއެވެ.

ރައީސުލްޖުމްހޫރިއްޔާގެ އޮފީހާއި، ޕީއެސްއެމް ގުޅިގެން ކުރިއަށްގެންދާ "އަހާ" ސިލްސިލާގެ ފޯރަމްތަކަކީ 2024 ވަނަ އަހަރުން ފެށިގެން ކުރިއަށްގެންދާ ސިލްސިލާ ޕްރޮގްރާމެކެވެ.