ރަށްރަށުގައި ސަރުކާރުން ޤާއިމްކޮށްފައިވާ ކުޅިވަރު ވަސީލަތްތައް ދެމެހެއްޓެނިވިގޮތެއްގައި ބަލަހައްޓައި މަރާމާތުކުރުމަށްޓަކައި ޚާއްސަ ބަޖެޓެއް އެކުލަވާލައި، އެކަމަށް ޚާއްސަ ޕްލޭނެއް ރޭވިފައިވާކަމަށް ކުޅިވަރާއި ހަށިހެޔޮކަމާ ބެހޭ ވަޒީރު ޢަބްދުﷲ ރާފިޢު ވިދާޅުވެއްޖެއެވެ.

ވަޒީރު މިހެން ވިދާޅުވީ ޕީއެސްއެމް އިން ގެނެސްދޭ "އަހާ" ޕްރޮގްރާމުގައި އާންމު ރައްޔިތަކު، ރަށްރަށުގައި ޤާއިމްކޮށްފައިވާ ކުޅިވަރު ދަނޑުތަކާއި ކޯޓުތައް ނުބެލެހެއްޓި ހަލާކުވަމުންދާތީ އެކަމުގެ ކަންބޮޑުވުން ފާޅުކުރުމާ ގުޅިގެން ދެއްވި ޖަވާބުގައެވެ.

ވަޒީރު ވިދާޅުވީ މީގެ ކުރިން އޮނިގަނޑު ރޭވިފައި އޮތްގޮތުން ބައެއް ފެސިލިޓީސްތައް ކައުންސިލްގެ ދަށުގައި އަދި އަނެއްބައި ފެސިލިޓީސްތައް ވުޒާރާގެ ބެލުމުގެ ދަށުގައި ހުރުމުގެ އިތުރުން، މިކަންކަން ވަށާޖެހޭ އުސޫލަކުން ބަލަހައްޓާނެ ނިޒާމެއް ޤާއިމްވެފައި ނެތް ކަމަށެވެ. މީގެ ސަބަބުން އެކި ސަރަހައްދުތަކުގައި ހުރި ގިނަ ވަސީލަތްތަކެއް ހަލާކުވެ، މަރާމާތުކުރުމުގެ ބަދަލުގައި އެއްކޮށް ބަދަލުކުރަންޖެހޭ ހާލަތަށް ގޮސްފައިވާ ކަމަށް ވަޒީރު ފާހަގަކުރެއްވިއެވެ.

ރަށްރަށުގެ ފިޓްނެސް ސެންޓަރުތައް ބެލެހެއްޓުމާ ގުޅޭގޮތުން ވަޒީރު ވިދާޅުވީ، "އޭގެން ކޮންމެ ސެންޓަރަކަށް މެއިންޓަނަންސް ބަޖެޓެއް ހަމަޖެހިގެން، ބަޖެޓުގެ ތެރެއިން އެކަން ހަމަޖެހިގެން ވަށާޖެހޭގޮތަށް ކުރެވިގެންދާނެ" ކަމަށެވެ.

ރާއްޖޭގެ އާބާދީއަކީ ގައިންގަޔަށް ނާރާ ބަލިތަކާ ދުރު ދުޅަހެޔޮ އާބާދީއަކަށް ހެދުމަށްޓަކައި ސަރުކާރުން ފަށާފައިވާ ޤައުމީ ހަރަކާތުގެ ދަށުން، ކޮންމެ ރަށެއްގައި އައުޓްޑޯ ޖިމްއަކާއި ފިޓްނެސް ސެންޓަރެއް ބިނާކުރުމުގެ ބިޔަ މަޝްރޫޢެއް ސަރުކާރުން ވަނީ ފައްޓަވާފައެވެ. އަދި މި ވަސީލަތްތަކުގެ ބޭނުން ދެމެހެއްޓެނިވި ގޮތެއްގައި އާންމުންނަށް ހިފޭނެގޮތަށް ކަންކަން ބައްޓަންކުރުމަށް ސަރުކާރުން ޚާއްސަ އިސްކަމެއް ދެއްވާކަމަށްވެސް ވަޒީރު ވަނީ ވިދާޅުވެފައެވެ.