އޯގަނައިޒޭޝަން އޮފް އިސްލާމިކް ކޯޕަރޭޝަން (އޯ.އައި.ސީ) ގެ ޔޫތު ކެޕިޓަލް 2026 ޕްރޮގްރާމުގެ ހަވާސާގައި، ދިވެހިރާއްޖޭގެ ޒުވާނުން ބާރުވެރިކުރުވުމާއި، ކުޅިވަރާއި ހަށިހެޔޮކަމާ ބެހޭ ވަޒީރު ޢަބްދުالله ރާފިއު، ތުރުކީވިލާތުގެ ޔޫތު އެންޑް ސްޕޯޓްސް މިނިސްޓަރު ޑރ. އުސްމާން އާޝިން ބަކްއާ ބައްދަލުކުރައްވައިފިއެވެ.

މި ބައްދަލުކުރެއްވުމުގައި މައިގަނޑު ގޮތެއްގައި މަޝްވަރާކުރައްވާފައިވަނީ ޒުވާނުންނާއި ކުޅިވަރުގެ ދާއިރާއިން ދެ ޤައުމުގެ ދެމެދުގައި އޮތް ގުޅުން އިތުރަށް ބަދަހިކުރުމަށާއި، ދެ މިނިސްޓްރީ ގުޅިގެން މަސައްކަތް ކުރެވޭނެ ދާއިރާތަކާ ގުޅޭގޮތުންނެވެ. އެގޮތުން ގުޅިގެން ކުރެވޭނެ ކަންކަން ތަންފީޒުކުރުމަށްޓަކައި އެކުލަވާލާ ފަހުމުނާމާ (އެމްއޯޔޫ) އަށް އިސްކަންދީ، އެ އެއްބަސްވުމުގައި ސޮއިކޮށް ވީހާވެސް އަވަހަކަށް ޢަމަލީ މަސައްކަތްތައް ފެށުމަށް ދެ ފަރާތުން މަސައްކަތް ކުރާނެ ކަމަށް ތުރުކީގެ ސްޕޯޓްސް މިނިސްޓްރީން ވަނީ ހާމަކޮށްފައެވެ.

މި އެއްބަސްވުމުގެ ދަށުން ތުރުކީގެ އެންމެ މަތީ ފެންވަރުގެ ޓްރެއިނިންގ ކޭމްޕުތަކުގައި ބައިވެރިވެ، ދިވެހި އެތުލީޓުންނަށް ފެންވަރު ރަނގަޅު ތަމްރީނުތައް ހޯދުމުގެ ފުރުޞަތު ފަހިވެގެންދާނެއެވެ. މީގެއިތުރުން، ތުރުކީގެ އެހީތެރިކަމާއެކު ރާއްޖޭގެ ބާސްކެޓްބޯޅަ އަދި ވޮލީބޯޅަ ކޯޗުންގެ ހުނަރު އިތުރަށް ތަރައްޤީކުރުމާއި، އެ ދާއިރާތަކުން ކޯޗުން ތަމްރީނުކުރުމާ ގުޅޭގޮތުންވެސް ދެ ވަޒީރުން ވަނީ ފުޅާ ދާއިރާއެއްގައި ޚިޔާލު ބަދަލުކުރައްވާފައެވެ.

މި އެމްއޯޔޫގައި ހިމެނުމަށް ކަނޑައަޅާފައިވާ މުހިންމު ދާއިރާތައް:

• ސްޕޯޓްސް ޕާފޯމަންސް އަދި ސްޕޯޓްސް ސައިންސް ކުރިއެރުވުން.
• ނުކުޅެދުންތެރިކަން ހުންނަ ފަރާތްތަކަށް ޚާއްޞަ އެޑަޕްޓިވް ސްޕޯޓްސް އަދި ޕެރަލިމްޕިކް ޑިވެލޮޕްމަންޓް.
• ޒުވާނުންގެ ހުނަރުތަކަށް ޚާއްޞަ ޔޫތު އިނޮވޭޝަން ހަބްތަކާއި ސަރަޙައްދީ ފެންވަރުގެ ވަސީލަތްތައް (ފެސިލިޓީސް) ޤާއިމުކުރުން.
• ޑޭޓާ ޑްރައިވަން ގަވަނަންސްއާއި ޒުވާނުންނާއި އެތުލީޓުން ބަދަލުކުރުމުގެ (އެކްސްޗޭންޖް) ޕްރޮގްރާމްތައް.
• ސްކޮލަޝިޕްގެ ފުރުޞަތުތަކާއި، ޢާންމު ޞިއްޙަތު ރައްކާތެރިކުރުމުގެ ޕްރޮގްރާމްތައް.

މި ބައްދަލުވުން ނިންމަވާލައްވަމުން ދެ ޤައުމުންވެސް ވަނީ ދިވެހި ޒުވާނުންނަށާއި އެތުލީޓުންނަށް އިތުރު ފުރުޞަތުތައް ފަހިކޮށްދީ، ބައިނަލްއަޤްވާމީ މައިދާނުގައި ކާމިޔާބީތައް ހޯދުމަށް ގުޅިގެން މަސައްކަތްކުރުމަށް އެއްބަސްވެފައެވެ.