މި އަހަރުގެ މިހާތަނަށް މުދަލު ޒަކާތުގެ ގޮތުގައި ދައުލަތަށް ބަލައިގަތް ޢަދަދު، 2025 ވަނަ އަހަރު ޖުމްލަ ލިބުނު ޢަދަދަށްވުރެ އިތުރުވެއްޖެއެވެ.

އެގޮތުން 2026 ވަނަ އަހަރުގެ ސެޕްޓެންބަރު މަހުގެ ނިޔަލަށް މުދަލު ޒަކާތުގެ ގޮތުގައި ޖުމްލަ 109.26 މިލިއަން ދިވެހި ރުފިޔާ ވަނީ ބަލައިގެންފައެވެ.

ތަފާސްހިސާބުތަކުން ދައްކާ ގޮތުގައި، 1 ޖަނަވަރީ 2026 އިން ފެށިގެން 30 ސެޕްޓެންބަރު 2026 ގެ ނިޔަލަށް މުދަލު ޒަކާތުގެ ގޮތުގައި ޖުމްލަ 109,262,025.69 ރުފިޔާ ވަނީ ލިބިފައެވެ. މިއީ 2025 ވަނަ އަހަރު މުޅިއެކު ލިބުނު 106,456,071.00 ރުފިޔާއާ އަޅާބަލާއިރު 2,805,954.69 ރުފިޔާގެ އިތުރުވުމެކެވެ. މިއީ ގާތްގަނޑަކަށް %2.64 ގެ ކުރިއެރުމެކެވެ.

މި އަހަރުގެ ސެޕްޓެންބަރު މަހުގެ 30 ވަނަ ދުވަހުގެ ނިޔަލަށް މުދަލު ޒަކާތުގެ ގޮތުގައި ބަލައިގަތް ފައިސާގެ ތަފްޞީލަށް ބަލާއިރު:

• ދިވެހި ރުފިޔާ: 108,739,116.62 ރުފިޔާ
• އެމެރިކާ ޑޮލަރު: 34,021.41 ޑޮލަރު

މިދިޔަ 2025 ވަނަ އަހަރުގެ ޖުމްލަ ޢަދަދު މި އަހަރު ފަހަނައަޅައި ގޮސްފައި މިވަނީ އަހަރު ނިމެން އަދި ތިން މަސްދުވަސް ބާކީ އޮއްވައެވެ. އެހެންކަމުން، އޮކްޓޫބަރު މަހުން ފެށިގެން ޑިސެންބަރު މަހުގެ ނިޔަލަށް ލިބޭ ފައިސާއާއެކު، މިއަހަރު މުދަލު ޒަކާތުގެ ގޮތުގައި ލިބޭ ޖުމްލަ ޢަދަދު މިހާރަށްވުރެވެސް ބޮޑުތަނުން އިތުރުވެގެންދާނެއެވެ.