2027 ވަނަ އަހަރުގެ އެކަޑެމިކް ކަލަންޑަރު އެޑިޔުކޭޝަން މިނިސްޓްރީން ނެރިފައިވާއިރު، އޭގެން ދައްކާގޮތުގައި މި އަންނަ އަހަރުގެ ދިރާސީ އާ އަހަރުގެ ކިޔެވުން ފެށޭނީ ޖެނުއަރީ 17 ގަ އެވެ.

ދިރާސީ އާ އަހަރުގެ ކިޔެވުން ޖެނުއަރީ 17 ގައި ފެށިނަމަވެސް ކަލަންޑަރުންގެ ދައްކާގޮތުގައި ޓީޗަރުން ސްކޫލުތަކަށް ރިޕޯޓްކުރަންޖެހެނީ ޖެނުއަރީ 13 ވަނަ ދުވަހު އެވެ.

ހަމައެއާއެކު ކިޔެވުން ފެށިގެން މަހެއްހަމަނުވަނިސް ފެބްރުއަރީ 8 ވަނަ ދުވަސް ރޯދަމަހުގެ ފުރަތަމަ ދުވަހަށް ވާތީ އެދުވަސް ބަންދުދުވަހެއްގެ ގޮތުގައި ކަލަންޑަރުގައިވަނީ ކަނޑައަޅާފަ އެވެ. އަދި ފުރަތަމަ ޓާމްގެ މިޑް ބްރޭކް މެއި މަހުގެ 16 އިން 22 ލިބޭއިރު ފުރަތަމަ ޓާމްގެ ކިޔެވުން ނިންމާ ދަރިވަރުންނަށް ޗުއްޓީ ލިބޭނީ ޖުލައި މަހުގެ 16އިން 31އަށެވެ.

ދަރިވަރުން ފުރަތަމަ ޓާމް ޗުއްޓީ ނިންމުމަށްފަހު ދެވަނަ ޓާމްގެ ކިޔެވުމަށް މިއަންނަ އަހަރުގެ އޯގަސްޓު މަހުގެ 1 ވަނަ ދުވަހު ނިކުންނައިރު، އެ ޓާމްގެ ކިޔެވުން ނިންމައި ބޮޑު ޗުއްޓީީއަށް ދާނީ ޑިސެންބަރު 10 އިން ޖެނުއަރީ 4 އާހަމައަށެވެ. އަދި 2028 ވަނަ އަހަރުގެ ކިޔެވުން ފެށޭނީ ޖެނުއަރީ 9 ވަނަ ދުވަހު އެވެ.

އެހެން އަހަރުތަކެކޭ އެއްގޮތައް މިއަހަރުގައިވެސް ބަންދު ދުވަސްތަކާއި އަލަށް ސްކޫލްއަށް ދަރިވަރުން ވައްދާ ތާރީޚާއި އެއް ސްކޫލްއިން އަނެއް ސްކޫލްއަށް ދަރިވަރުން ބަދަލުކުރެވޭނެ މުއްދަތުވެސް ހިމަނާފައިވެ އެވެ. މީގެއިތުރުން ސްކޫލުގައި ކިޔަވައިދޭނެ ދުވަސްތަކާއި އެއް ދަންފަޅީގައި ކިޔަވައިދޭނެ ދުވަސްތައް ވަކިކޮށްފައިވާއިރު،ކުޑަކުދިންގެ ދުވަހާއި ޓީޗަރުންގެ ދުވަހަކީ އެއް ދަންފަޅީގައި ކިޔަވައިދޭ ދުވަސްތައްކަމަށް ކަނޑައަޅާފައިވެ އެވެ.

މިހާރު ދަރިވަރުން ކިޔަވަމުންދަނީ ދެވަނަ ޓާމްގެ ކިޔެވުމެވެ. އަދި ދަރިވަރުން ޗުއްޓީއަށް ދާނީ ޑިސެންބަރު 18 އިން ފެށިގެންނެވެ.