ފަހި ދިރިއުޅުން ކޯޕަރޭޝަން(އެފްޑީސީ) ގެ ފްލެޓްތައް ކުއްޔަށް ދިނުމުގެ 16 މައްސަލައެއް ބަލަމުންދާކަމަށް އެފްޑީސީން ހާމަކޮށްފި އެވެ.

އެފްޑީސީން ހުޅުމާލޭގައި ތަރައްގީކޮށްފައިވާ ފްލެޓްތަކާ ގުޅިގެން ބަލަމުންދާ މައްސަލަތަކުގެ އަދާހަމަ ހިއްސާކޮށްފައިވާއިރު، ގަވައިދާ ހިލާފަށް ކުނި އެޅުމުގެ މައްސަލަތަކާއި، ހުއްދަނެތި ކުއްޔަށް ދޫކުރުމުގެ މައްސަލައިގެ އިތުރުން ހުއްދަނެތި އެޕާޓްމަންޓަށް ބަދަލު ގެނައުމުގެ މައްސަލަތައް ހިމެނެ އެވެ.

ހުޅުމާލެ ފޭސް 2 ގައި ތަރައްގީކޮށްފައިވާ 4000 ހައުސިންގް ޔުނިޓުގައި ދިރިއުޅޭ ފަރާތްތަކާއި ގުޅިގެން ހުށަހެޅޭ މައްސަލަަތައް އެފްޑީސީން ބަލަމުންދާއިރު، މިދިޔަ މަހުގެ 21 ވަނަ ދުވަހާ ހަމައަށް އެ ފްލެޓުތަކާ ގުޅޭ 49 މައްސަލަ ހުށަހަޅައި، ބަލަމުންދާކަމަށް އެކުންފުނިން ހާމަކުރި އެވެ.

ތަފާސްހިސާބުތަކުން ދައްކާގޮތުގައި އެކުންފުނިން ބަލަމުންދާ މައްސަލަތަކުގެ ތެރެއިން ހުއްދަނެތި ހައުސިންގް ޔުނިޓަށް ބަދަލުގެނައުމުގެ 28 މައްސަލައެއް ބަލަމުންދެ އެވެ. އޭގެތެރެއިން 5 މައްސަލައެއްގައި ޔުނިޓުގެ ވެރިފަރާތް ޖޫރިމަނާކޮށްފައިވާއިރު، އަނެއް މައްސަލަތައް ބަލަމުންދާކަމަށް ހާމަކޮށްފައިވެ އެވެ.

ސަރުކާރުގެ ބޯހިޔާވަހިކަމުގެ މަޝްރޫއުގެ ދަށުން ލިބޭ ފްލެޓްތައް ކުއްޔަށް ދޫކުރާ މައްސަލަަތއް ފެންމަތިވެފައިވާއިރު، އެފްޑީސީން މި ފްލެޓްތައް ދީފައިވަނީ ކުއްޔަށް ދީފިނަމަ ފިޔަވަޅު އަޅޭނެކަމުގެ އިންޒާރުދިނުމަށްފަހު އެވެ. ނަމަވެސް މިހާރުވެސް މި މުއްދަތުގެ ތެރޭގައި ހުއްދަނެތި ކުއްޔަށް ދޫކުރުމުގެ 16 މައްސަލައެއް ބަލަމުންދާއިރު،އޭގެތެރެއިން 5 ޔުނިޓެއްގެ ވެރިފަރާތް ޖޫރިމަނާކޮށްފައިވެ އެވެ. އަދި 2 ޔުނިޓެއްގެ ވެރިފަރާތަށް ނޯޓިސް ފޮނުވާފައިވާއިރު، މިހާރު ބަލަމުންދަނީ ކުއްޔަށް ދިނުމާ ގުޅޭ 9 މައްސަލައެކެވެ.

މީގެއިތުރުން ދެން އެންމެ ގިނައިން ހުށަހެޅިފައިވާ މައްސަލައަކީ ގަވައިދާ ހިލާފަށް ކުނި އެޅުމުގެ މައްސަލަތަކެވެ. އެގޮތުން ގަވާއިދާ ޚިލާފަށް ކުނި އެޅުމުގެ 3 މައްސަލައެއް ފާހަގަކުރެވިފައިވާއިރު، މީގެ ތެރެއިން 2 މައްސަލައެއްގައި ހިމެނޭ ފަރާތްތައް ޖޫރިމަނާކޮށްފައިވާ ކަމަށް އެ ކުންފުނިން ހާމަކޮށްފައިވެ އެވެ. އަދި އެންގުންތަކަށް ޢަމަލުނުކުރުމުގެ 2 މައްސަލައެއް ބަލަމުން އަންނައިރު އަޑުގަދަވުމުގެ ޝަކުވާއާއި ގުޅިގެން 2 މައްސަލަ ބަލާފައިވާ ކަމަށް އެފްޑީސީގެ ތަފާސްހިސާބުތަކުން ދައްކަ އެވެ.

ސަރުކާރުގެ ބޯހިޔާވަހިކަމުގެ މަޝްރޫއުގެ ދަށުން ދޫކުރާ ފްލެޓްތަކަކީ ކުލި ކުޑަ ފްލެޓްތަކެއް ނަމަވެސް މަހުން މަހަށް ގަވާއިދުން ކުލި 3،362 ޔުނިޓުން ދައްކާއިރު، ގަވާއިދުން ކުލި ނުދައްކާ 564 ޔުނިޓު ހުރިކަން އެކުންފުނިން ފާހަގަކުރި އެވެ.

އެފްޑީސީގެ ބެލުމުގެ ދަށުގައިވާ ފްލެޓްތަކަކީ އަމާން އުދަރެސް އަދި އަމާން ދޯދި ފްލެޓްތަކެވެ.