މުދަލާއި ޚިދުމަތުގެ އަގުން ޓެކްސް ނެގުމުގެ ޤާނޫނަށް ގެނެވުނު 8 ވަނަ އިޞްލާޙުގައިވާ ގޮތުގެ މަތިން ދިވެހިރާއްޖޭގައި ވިޔަފާރީގެ ދާއިމީ ތަނެއް ނެތް ފަރާތްތަކުން ފޯރުވައިދޭ އިންބައުންޑް ޓޫރިޒަމް ޕްރޮޑަކްޓާއި އެފަދަ ޕްރޮޑަކްޓްތަކާ ގުޅޭގޮތުން ފޯރުވައިދޭ އޭޖެންސީ ނުވަތަ ބުކިންގ ޚިދުމަތަކުން ޖީ.އެސް.ޓީ ނަގަން ފަށައިފިއެވެ.

މި ޖީއެސްޓީ ނަގަން ފެށީ 1 އޮކްޓޯބަރ 2026 އިން ފެށިގެންނެވެ.

މޯލްޑިވްސް އިންލޭންޑް ރެވެނިއު އޮތޯރިޓީ އިން ބުނީ މި ބަދަލާއެކު، ރާއްޖެއިން ބޭރުގެ ޓުއަރ އޮޕަރޭޓަރުންނާއި، ޓްރެވަލް އެޖެންސީތައް އަދި ބުކިންގ ޕްލެޓްފޯމުތަކުން ފޯރުކޮށްދޭ އިންބައުންޑް ޓޫރިޒަމް ޕްރޮޑަކްޓްތަކާއި، އެއާ ގުޅުންހުރި ބުކިންގ އަދި އެޖެންސީ ޚިދުމަތްތަކުން %17 ގެ ރޭޓުގައި ޖީ.އެސް.ޓީ ނަގަން ޖެހެއެވެ.

މީރާއިން މިހާރު ވަނީ، ބޭރުގެ ފަރާތްތައް ޖީ.އެސް.ޓީއަށް ރަޖިސްޓަރީކުރުމަށް ޚާއްޞަ ކެމްޕޭނެއް ފަށާފައެވެ. މިގޮތުން، ޖީ.އެސް.ޓީއަށް ރަޖިސްޓަރީވުމަށް އެދި ހުށަހަޅަންޖެހޭނީ މީރާގެ ވެބްސައިޓުގައިވާ ޚާއްޞަ ޕޯޓަލް މެދުވެރިކޮށް، 'MIRA 120 (GST Registration – Overseas Suppliers)'  ފޯމު ފުރިހަމަކުރެއްވުމަށްފަހުގައެވެ. މި ފޯމު ފުރުމާ ގުޅޭ އިރުޝާދުތައް މީރާގެ ރަސްމީ ވެބްސައިޓުން ލިބެން ހުންނާނެއެވެ. އަދި ރަޖިސްޓަރީވުމުން، ޖީ.އެސް.ޓީ ޓިން (TIN) ހިމެނޭ ސެޓްފިކެޓްގެ އިތުރުން، ޓެކްސް ބަޔާން ހުށަހެޅުމަށާއި ފައިސާ ދެއްކުމަށް ބޭނުންވާ 'މީރާކަނެކްޓް' އެކައުންޓެއް އެ ފަރާތްތަކަށް ހަމަޖެހިގެންދާނެ ކަމަށްވެސް އެ އޮތޯރިޓީން މަޢުލޫމާތުދެއެވެ. މީގެއިތުރުން، މީރާއިން ޝާއިޢުކޮށްފައިވާ "ޖީ.އެސް.ޓީ ގައިޑް: އިންބައުންޑް ޓޫރިޒަމް ޕްރޮޑަކްޓްސް އެންޑް ރިލޭޓަޑް ބުކިންގް އޯރ އެޖެންސީ ސަރވިސަސް" މެދުވެރިކޮށް މިކަމުގެ ފުރިހަމަ މަޢުލޫމާތު ލިބިވަޑައިގަންނަވާނެއެވެ.

މިކަމާ ގުޅޭގޮތުން އިތުރު މަޢުލޫމާތު ސާފުކުރެއްވުމަށާއި އުފެދޭ ސުވާލުތަކަށް ޖަވާބު ހޯއްދެވުމަށް [email protected]  އަށް އީމޭލް ކުރެއްވުމުން މީރާއިން އެހީތެރިކަން ފޯރުކޮށްދެމުންދާނެއެވެ.

މީގެ އިތުރުން މީރާ ވެބްސައިޓްގައިވާ ޗެޓް ފަންކްޝަން މެދުވެރިކޮށް ޓެކްސްޓް މެސެޖް ނުވަތަ ވޮއިސް ކޯލްވެސް ކުރެއްވޭނެ ކަމަށް މީރާއިން މަޢުލޫމާތު ދެއެވެ. އަދި 9607251415+ ނަންބަރު މެދުވެރިކޮށް ވަޓްސްއެޕް ނުވަތަ ވައިބަރ ބޭނުން ކުރައްވައިގެންވެސް މަޢުލޫމާތު ސާފުކުރެއްވޭނެއެވެ. އަދި ޓެކްސް ދައްކާ ފަރާތްތަކަށް މަޢުލޫމާތު ދިނުމުގެ ގޮތުން މީރާއިން ދަނީ އޮންލައިން ސެޝަންތަކެއް ބާއްވަމުން ކަމަށާއި، މީރާ ވެބްސައިޓް މެދުވެރިކޮށް މި ސެޝަންތަކުގައި ބައިވެރިވުމަށް ރަޖިސްޓަރީ ކުރެވޭނެކަމަށްވެސް މީރާއިން މަޢުލޫމާތުދެއެވެ.