އދ. ކުނބުރުދޫގައި އަލަށް ގާއިމްކުރި ފުލުހުންގެ މަރުކަޒާއެކު ރައްޔިތުންނާ ގާތުން، ރައްޔިތުންގެ އިތުބާރު ލިބޭ ފަދަ ފުރިހަމަ ހިދުމަތެއް ފުލުހުންގެ ފަރާތުން ފެނިގެންދާނެ ކަމަށް އުންމީދުކުރައްވާ ކަމަށް ދާޚިލީ ސަލާމަތާއި ފަންނިއްޔާތާ ބެހޭ ވަޒީރު ޢަލީ އިޙްސާން ވިދާޅުވެއްޖެ އެވެ.

ކުނބުރުދޫގައި އަލަށް އިމާރާތްކުރި ފުލުހުންގެ މަރުކަޒު ރަސްމީކޮށް ހުޅުވައިދެއްވާ ދެއްކެވި ވާހަކަގައި ވަޒީރު ވިދާޅުވީ ގައުމީ ފެންވަރުގައި ފުލުހުންގެ ޚިދުމަތުން ޚާއްސަ އިސްކަމެއް ދީގެން ހައްލުކުރަންޖެހޭ މައިގަނޑު ހަތަރު ދާއިރާއެއްވާ ކަމަށެވެ.

އޭގެ ތެރޭގައި މަސްތުވާތަކެތީގެ މާހައުލު ނައްތާލުމާއި، ގޭންގު ކުށްތައް ހުއްޓުވުމާއި، ގަވާއިދާ ހިލާފަށް އުޅޭ ބިދޭސީންގެ މައްސަލަ ހައްލުކުރުމުގެ އިތުރުން ކުޑަކުދިން ކުށުގެ ވެށިން ރައްކާތެރިކުރުން ހިމެނޭކަމަށް ވަޒީރު ފާހަގަކުރި އެވެ. އަދި އާ މަރުކަޒާއެކު ރައްޔިތުންނާ ގާތުން، ރައްޔިތުންގެ އިތުބާރު ލިބޭ ފަދަ ފުރިހަމަ ހިދުމަތެއް ފުލުހުންގެ ފަރާތުން ފެނިގެންދާނެ ކަމަށް އުންމީދުކުރައްވާ ކަމަށް ވަޒީރު ވިދާޅުވި އެވެ.

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވެރިކަމާ ހަވާލުވެވަޑައިގެންނެވިއިރު ރާއްޖޭގެ 63 ރަށެއްގައި ފުލުހުން ފިޒިކަލީ ގާއިމުވެ ތިބެގެން ހިދުމަތް ދެމުން ނުދާކަން ވަޒީރުގެ ވާހަކައިގައި ފާހަގަކުރެއްވި އެވެ. ނަމަވެސް، ފުލުހުން ކުރެއްވި ބުރަ މަސައްކަތުން މިހާރު އެ 63 ރަށުގައި ވެސް ފުލުހުން ގާއިމުވެ ތިބެގެން ހިދުމަތް ދެމުންދާކަން ވަޒީރު ފާހަގަކުރެއްވިއިރު، އޭރު އަމިއްލަ މަރުކަޒުތައް ހުރީ އެންމެ 17 ރަށުގައި ކަމަށާއި، ގާތްގަނޑަކަށް 170 އެއްހައި ރަށުގައި ފުލުހުން ހިދުމަތް ދެމުންދިޔައީ ކައުންސިލު އިދާރާތަކާއި އަމިއްލަ ތަންތަން ކުއްޔަށް ހިފައިގެން ވަރަށް ދަތި ހާލުގައި ކަމަށްވެސް ވަޒީރު ވިދާޅުވި އެވެ.

ރަށްރަށުގައި ފުލުހުންގެ ހިދުމަތް ދިނުމަށް ހާއްސަކޮށް ޑިޒައިންކުރެވިފައިވާ 154 މަރުކަޒު އެޅުމަށް ސަރުކާރުން ފަށާފައިވާ ބޮޑު މަޝްރޫއުގެ މައްޗަށް އަލިއަޅުވައިލައްވަމުން ވަޒީރު ވިދާޅުވީ، ކުނބުރުދޫ ފަދަ އާބާދީ ކުދި އަދި ކުށް މަދު ރަށްރަށުގައި ވެސް ފުލުހުންގެ ހާއްސަ މަރުކަޒުތައް ގާއިމުކުރުމުގެ މައިގަނޑު މަގުސަދަކީ ކުށުގެ ވެށި އުފެދުމުގެ ކުރިން މުޖުތަމައާ ގުޅިގެން އަމާން ވެއްޓެއް ދެމެހެއްޓުން ކަމަށެވެ.

"ރަށުގައި މާ ބައިވަރު އަދި ކުށްތަކެއް ނުހިނގިކަމުގައިވިޔަސް، މިދަފަ މަރުކަޒެއް ހުރެގެން ރަށުގެ ރައްޔިތުންނާއި ރަށުގެ އެކިއެކި މުއައްސަސާތަކާ ގުޅިގެން ފުލުހުން ކުރަމުންދާ ކޮމިއުނިޓީ ބޭސްޑް މަސައްކަތްތަކަކީ ރަށުގެ ކުށުގެ މާހައުލު ނެތި މި އޮންނަ އަމާން ވެށި ދެމެހެއްޓުމަށްޓަކައި ކޮންމެހެން ކުރަންޖެހޭ ކަމެއް" ވަޒީރު ވިދާޅުވި އެވެ.

ކުނބުރުދޫގެ ޕޮލިސް ޕޯސްޓުގެ އިމާރާތް ކުރު މުއްދަތެއްގެ ތެރޭގައި ފުރިހަމަކޮށް ނިންމުމުގައި ކޮންޓްރެކްޓަރ އާރުޑީސީން ދެއްވި އަހައްމިއްޔަތުކަމަށާއި، ދާއިރާގެ އިއްޒަތްތެރި މަޖިލިސް މެންބަރާއި، ކުނބުރުދޫ ކައުންސިލާއި ރައްޔިތުންގެ ފަރާތުން ލިބުނު ފުރިހަމަ އެއްބާރުލުން ފާހަގަކުރައްވައި ވަޒީރު ވަނީ އެ ފަރާތްތަކަށް ޝުކުރު އަދާކުރައްވާފަ އެވެ.

ރޯޑް ޑިވެލޮޕްމަންޓް ކޯޕަރޭޝަން (އާރްޑީސީ) އާ ހަވާލުކޮށްގެން، 2025 އޮކްޓޫބަރު 7ގައި ބިންގާއަޅައި، އަހަރެއްހައި ދުވަހުގެ ތެރޭގައި މަސައްކަތް ނިންމައި އިއްޔެ މި މަރުކަޒު ހުޅުވައިދެއްވީ، ދާޚިލީ ސަލާމަތާއި ފަންނިއްޔާތާ ބެހޭ ވަޒީރު ޢަލީ އިޙްސާނާއި ކޮމިޝަނަރ އޮފް ޕޮލިސް އަޙްމަދު މުޙައްމަދެވެ.

މި ރަސްމިއްޔާތުގައި، ޑެޕިއުޓީ ކޮމިޝަނަރ ފަރުހާދު ފިކުރީއާއި، ދާއިރާގެ މަޖިލިސް މެންބަރާއި، ކުނބުރުދޫ ކައުންސިލު ރައީސާއި، އާރްޑީސީގެ މެނޭޖިންގ ޑިރެކްޓަރާއި، ފުލުހުންގެ ޚިދުމަތުން ރިޓަޔަރ ކުރައްވާފައިވާ އިސް އޮފިސަރުން ކަމަށްވާ ޑެޕިއުޓީ ކޮމިޝަނަރ (ރިޓަޔަރޑް) އަޙްމަދު ޞާދިޤް އަދި ޗީފް ސުޕްރިންޓެންޑެންޓް (ރިޓަޔަރޑް) އިބްރާހީމް މަނިކުގެ އިތުރުން ފުލުހުންގެ އެގްޒެކެޓިވް އޮފިސަރުންނާއި ރަށުގެ ގިނަ އަދަދެއްގެ ރައްޔިތުން ބައިވެރިވި އެވެ.