ސަރުކާރުގެ ސިޔާސަތުތަކުގެ ސަބަބުން ގައުމު ދަނީ ބޮޑު އަނދަވަޅަކާ ދިމާއަށް ކަމަށާއި މި ސަރުކާރު ބަދަލުކުރުން ލާޒިމުވެފައިވާ ކަމަށް އެމްޑީޕީގެ ޗެއަރޕާސަން އަދި ކުރީގެ ރައީސް މުހައްމަދު ނަޝީދު ވިދާޅުވެއްޖެއެވެ.

އެމަނިކުފާނު މިހެން ވިދާޅުވީ އެމްޑީޕީ ކޮންގްރެސް ހުޅުވުމަށް ބޭއްވި ޖަލްސާގައި ވާހަކަ ދައްކަވަމުންނެވެ.

ރައީސް ނަޝީދު ވިދާޅުވީ  ދޮށީ އުމުރުގެ މީހުންނާއި ޔަތީމުންގެ އިނާޔަތްތަކާއި، ރަށްރަށް ދަތުރުފަތުރުގެ ވިއުގައަކުން ގުޅާލުމާއި، ކޮވިޑް-19 ގެ ބަލިމަޑުކަމުން ގައުމު ސަލާމަތްކުރުމާއި ހިލޭ ފުރަތަމަ ޑިގްރީ އާއި މިނިމަމް ވޭޖު ތައާރަފްކުރީ އެމްޑީޕީ އިން ކަމަށެވެ. އަދި މިއީ ރައްޔިތުންގެ ލާބައަށް ކޮށްދިން މުހިންމު ކަންކަން ކަމަށެވެ.

ވެރިކަންކުރާ ޕީއެންސީ ސަރުކާރަށް ވަރަށްބޮޑަށް ފާޑުވިދާޅުވަމުން ރައީސް ނަޝީދު ވަނީ ގައުމުގެ މިސްރާބު ހުރީ ނުރައްކާތެރި ދިމާއަކަށް ކަމަށާއި، ރާއްޖޭގެ ސަލާމަތާއި ހަމަޖެހުން ގުޅިފައިވަނީ ހާރިޖީ ގޮތުން އަވަށްޓެރި ގައުމުތަކާ ގުޅުން ބަދަހިކުރުމުގެ މައްޗަށްކަމަށް ވިދާޅުވިއެވެ.

މީގެއިތުރުން ރާއްޖޭގެ ޖިއޮގްރަފީ އޮތްގޮތުން އިންޑިއާއާ އެކު ގާތް ގުޅުމެއް ބޭއްވުމަކީ އެހެން އެއްވެސް ގައުމަކަށް ބަދުބަހެއް ބުނުން ނޫން ކަމަށާއި އެއީ ގައުމުގެ ހަގީގީ މަސްލަހަތު ކަމަށް ވެސް ވިދާޅުވިއެވެ.

ރައީސް ނަޝީދު އިތުރަށް ވިދާޅުވީ ދިވެހި ރައްޔިތުންނަށް ދެން ވެސް ހެޔޮލަފާ އަދި ކާމިޔާބު ވެރިކަމެއް ކޮށްދެވޭނީ އެމްޑީޕީއަށް އެކަނިކަމަށެވެ.