ނުކުޅުދުންތެރިކަން ހުންނަ ފަރާތްތަކަށް ހަމަހަމަ ފުރުޞަތުތައް ހޯދައިދިނުމަށް ޚާއްސަ އިސްކަމެއްދެއްވާ ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެއެވެ.

އެމަނިކުފާނު މިހެން ވިދާޅުވީ މިހަފްތާގެ ރައްޔިތުންގެ އަޑު ޕްރޮގްރާމްގައެވެ.

މި ޕްރޮގްރާމުގައި ޑައުންސިންޑްރޯމް ހުންނަ ކުއްޖެއްގެ ބެލެނިވެރިއެއް ކަމުގައިވާ، ފާތިމަތު ފައިރޫޒާ އާދަމް ވަނީ ޑައުންސިންޑްރޯމް ހުންނަ މީހުންނާއި، އެހެނިހެން ނުކުޅުދުންތެރިކަން ހުންނަ ފަރާތްތަކަށް ތަޢުލީމާއި، ކުޅިވަރު ފަދަ ދާއިރާތަކުން ތަފާތުކުރުމަކާއި ނުލާ ޚިދުމަތްތައް ހޯދައިދޭންޖެހޭކަން ފާހަގަކޮށްފައެވެ.

އޭނާގެ ދަރިފުޅު ވަރަށް ކުޑައިރުވެސް ތަޢުލީމް ހާސިލްކުރަން ބޭނުންވި ސްކޫލުން ފުރުޞަތު ނުދިންކަމަށާއި ޑައުންސިންޑްރޯމް ހުންނަ ކުއްޖަކަށްވުމުން، ތަޢުލީމީ ނިޒާމުގެ ތެރެއިން ތަފާތުކުރުންތަކާއި ދަތިތަކާއި ދިމާވިކަމަށް ފައިރޫޒާ ފާހަގަކުރިއެވެ. ހަމައެހެންމެ، ޚާއްސަ އެހީއަށް ބޭނުންވާ ކުދިންނަށް، އެ ކުއްޖަކަށް އެންމެ އެކަށީގެންވާ ފަދަ ތަޢުލީމީ ފުރުޞަތުތައް ފަހިވާނެ އިންތިޒާމްތަކެއް ހަމަޖައްސާދިނުމަށާއި ބޯހިޔާވަހިކަމާއި، ތެރަޕީފަދަ ކަންކަމުގައި ވެސް ގިނަ ދަތިތަކެއް ދިމާވާކަން ފައިރޫޒާ ފާހަގަކުރިއެވެ.

މި ވާހަކަތަކަށް ރައީސް ޑރ. މުއިއްޒު ވިދާޅުވީ ނުކުޅުދުންތެރިކަން ހުންނަ ފަރާތްތަކަށް ހަމަހަމަ ފުރުޞަތުތައް ހޯދައިދެއްވުމަކީ އެ މަނިކުފާނު ޚާއްސަ އިސްކަމެއް ދެއްވާކަމެއްކަމަށާއި ސަރުކާރުން މަސައްކަތްކުރައްވަނީ މުޅި މުޖުތަމައަށް ފައިދާވާ ގޮތަށް، ހަމަހަމަ ފުރުޞަތުތަކެއް ހޯދާދިނުމަށްކަމަށެވެ.

މީގެއިތުރުން ފައިރޫޒާ ފާހަގަކުރެއްވި ހުރިހާ ކަމަކަށްއެޑްރެސްކުރައްވާނެ ކަމަށާއި ވީއެންމެ ރަނގަޅަކަށް ވީއެންމެ އަވަހަކަށް އެ ކަންކަމުގައި ވަކިކުއްޖަކަށް ނުބަލައި، މުޅި މުޖުމަޢުއަށް ފައިދާވާނެ ގޮތަކަށް ކަންކަން ފަހިވާން ބޭނުން ކަމުގައި ވެސް ރައީސް ވިދާޅުވިއެވެ.