ދިވެހި ރައްޔިތުންގެ ޑިމޮކްރަޓިކް ޕާޓީ (އެމްޑީޕީ) ގެ ކޮންގްރެސް މިރޭ ފަށައިފިއެވެ.

އެޕާޓީގެ ފަސް ވަނަ ކޮންގްރެސް ކުރިއަށްދަނީ މާލެ ސިޓީ ހޯލުގައެވެ.

މި ކޮންގްރެސްގައި އެމްޑީޕީގެ ލީޑަރޝިޕާއި، ކައުންސިލަރުންނާއި ގައުމީ މަޖިލީހާއި ގޮފިތަކުގެ ރައީސުންނާއި ބޭރުގެ ބައެއް ޤައުމުތަކުގެ ޢިއްޒަތްތެރިން ވެސް ވަނީ ބައިވެރިވެފައެވެ.

މާދަމާ މި ކޮންގްރެސްގައި އިންވެސްޓްމަންޓް ފޯރަމެއް ކުރިއަށްގެންދިއުމަށް ވަނީ ނިންމާފައެވެ. އަދި ހޮނިހިރު ދުވަހު ކޮންގްރެސްގެ ރިޕޯޓު ހުށަހެޅުމާއި އެމްޑީޕީގެ އެޕްލިކޭޝަން ލޯންޗުކުރުން ކުރިއަށްގެންދާނެކަމަށް އެމްޑީޕީ އިން ބުނެއެވެ. އަދި މި ކޮންގްރެސްގެ ބޮޑުބައި ތާވަލުކޮށްފައި އޮތީ ހޮނިހިރު ދުވަހަށެވެ.

އެގޮތުން ޕާޓީގެ އަސާސީ ޤަވާއިދަށް އިސްލާހު ގެނައުމާއި، ބޮޑު ބަދަލު ގަރާރު ހުށަހަޅައި، އެ ގަރާރަށް ބަހުސް ކުރުމާއި، ލާމަރުކަޒީ ގަރާރު ހުށަހެޅުމާއި އެ ޕާޓީގެ އަސާސީ ގަވާއިދަށް ހުށަހެޅުނު އިސްލާހުތަކަށް ވޯޓަށް އެހުން ވެސް އެދުވަހު އޮންނާނެއެވެ.

އެމްޑީޕީގެ ކޮންގްރެސްގައި އެ ޕާޓީގެ އަސާސީ ގަވާއިދަށް ހުށަހަޅާ އެންމެ މުހިންމު އިސްލާހެއްގެގޮތުގައި އެ ޕާޓީގެ އެންމެ އިސް މަގާމަކީ ޗެއަރޕާސަން ކަމަށް ކަނޑައަޅައި، އެ ޕާޓީގެ ރައީސާއި ނައިބު ރައީސްގެ މަގާމު އުވާލުމަށް ހުށަހަޅާނެކަމަށް މައުލޫމާތު ލިބެއެވެ.

އެމްޑީޕީގެ މިހާރުގެ ޗެއާޕާސަނަކީ ކުރީގެ ރައީސް މުހައްމަދު ނަޝީދެވެ.