ތަކުރާރުކޮށް ޓްރެފިކް ގަވާއިދާ ޚިލާފުވާ މީހުންނަށް ހަރުކަށި ފިޔަވަޅު އަޅާނެ ކަމުގައި ކޮމިޝަނަރ އޮފް ޕޮލިސް އަޙްމަދު މުޙައްމަދު ވިދާޅުވެއްޖެއެވެ.

ސީޕީ މިހެން ވިދާޅުވީ މަގުމަތީގެ ސަލާމަތާއި ރައްކާތެރިކަން ކަށަވަރުކުރުމަށްޓަކައި، ޓްރެފިކް ގަވާއިދުތަކާ ތަކުރާރުކޮށް ޚިލާފުވާ ފަރާތްތަކާމެދު ހަރުކަށި ފިޔަވަޅު އެޅުމާ ގުޅޭގޮތުން ދެއްވި މެސެޖެއްގައެވެ.

އެ މެސެޖުގައި ޓްރެފިކްގެ އާއްމު އުސޫލްތަކަށާއި، އަދަބުތަކަށް ބޯނުލަނބާ މަދު ބައެއްގެ ސަބަބުން، ގިނަ ބައެއްގެ ހައްގުތައް ގެއްލި، ނުރައްކާތެރި އެކި ހާދިސާތައް ހިނގަމުންދާކަން ފާހަގަކުރައްވާފައި ވެއެވެ. އެހެންކަމުން އެފަދަ އަމަލުތައް ހިންގާ ފަރާތްތަކާމެދު ހަރުކަށި ފިޔަވަޅު އަޅާނެކަމަށާއި، އެފަދަ ފަރާތްތަކަށް ފިޔަވަޅުއަޅަން އިދާރާތަކަށް އަންގަވާފައިވާނެކަމަށް ވެސް ވިދާޅުވިއެވެ.

މީގެ އިތުރުން މިއީ މަގުތަކަކީ އެންމެންނަށް ރައްކާތެރިތަނަކަށް ހެދުމަށާއި ނުރައްކާތެރި ހާދިސާތައް ހުއްޓުވުމުގެ މަގުސަދުގައި އަޅާ ފިޔަވަޅެއް ކަަމަށް ވެސް ސީޕީ ވިދާޅުވިއެވެ. އަދި އެ ފިޔަވަޅުތައް އަޅާނީ ކަމާގުޅުންހުރި އިދާރާތަކުން ގުޅިގެންކަމަށާއި، މާލެ ސަރަހައްދުގެ އިތުރުން އަތޮޅުތެރޭގައި ވެސް މިފަދައިން ފިޔަވަޅުތައް އަޅާނެކަމަށް ސީޕީ ވިދާޅުވިއެވެ.ފުލުހުން ކުރައްވާ މިފަދަ މަސައްކަތްތަކަށް އެންމެހާ ފަރާތްތަކުން އެއްބާރުލުން ދެއްވުމަށްވެސް ސީޕީ ވަނީ އިލްތިމާސްކުރައްވާފައެވެ.