މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) ގެ ކޮންގްރެސް ފެށުމުގެ ގޮތުން ބޭއްވި ޖަލްސާގައި ޕީއެންސީގެ ފަރާތުން އަޙްމަދު ޝިޔާމް ބައިވެރިވެވަޑައިގެންފިއެވެ.

ފިޝަރީޒް މިނިސްޓަރު އަދި ޕީއެންސީގެ ނައިބު ރައީސް، މި ޖަލްސާގައި ބައިވެރިވެވަޑައިގެންނެވީ ވެރިކަންކުރާ ޕާޓީ، ޕީއެންސީގެ ފަރާތުންނެވެ.

އެމްޑީޕީގެ ކޮންގްރެސް ރަސްމީކޮށް ފަށާފައިވާއިރު، މި މަހުގެ 3 ވަނަ ދުވަހުގެ ނިޔަލަށް މި ކޮންގްރެސް ކުރިއަށްދާނެއެވެ. މި ޖަލްސާ ޝަރަފުވެރިކޮށްދެއްވީ އެ ޕާޓީގެ ޗެއަރޕާސަން އަދި ކުރީގެ ރައީސް މުޙައްމަދު ނަޝީދުއެވެ.

އެމްޑީޕީގެ ކޮންގްރެސްގައި މާދަމާ މެންދުރުފަހު 14:00 ގައި އޮންނާނީ އިންވެސްޓްމަންޓް ފޯރަމެކެވެ. ކައުންސިލްތަކުން ހުށަހަޅާ މަޝްރޫއުތަކަށް އިންވެސްޓަރުން ހޯދުމަށް ބާއްވާ މި ފޯރަމްގައި ރައީސް ނަޝީދު ވާހަކަފުޅު ދެއްކެވުމަށް ހަމަޖެހިފައިވެއެވެ.

އެމްޑީޕީގެ ކޮންގްރެސްގެ މައިގަނޑު މަސައްކަތްތައް ފެށުމަށް ހަމަޖެހިފައިވަނީ ހޮނިހިރު ދުވަހުގެ ހެނދުނެވެ. އެ ދުވަހު ޕާޓީގެ އަސާސީ ގަވައިދަށް ހުށަހަޅާފައިވާ އިސްލާހުތަކަށް ބަހުސްކޮށް ވޯޓަށް އަހާގޮތަށް ވަނީ ހަމަޖެހިފައެވެ.

މި ޖަލްސާގައި ޕީއެންސީގެ ފަރާތުން ޝިޔާމް ބައިވެރިވެވަޑައިގެންނެވިއިރު، މީގެ ކުރިން ވެސް ސިޔާސީ ޕާޓީތަކުން ބާއްވާ މިފަދަ ބޮޑެތި ބައްދަލުވުންތަކާއި ކޮންގްރެސްތަކުގައި ބައިވެރިވުމަށް އެހެން ޕާޓީތަކުގެ އިސް ލީޑަރުންނަށް ދައުވަތު އަރުވައެވެ. އެގޮތުން މިފަހަރުގެ ކޮންގްރެސްގައި ވެސް ސިޔާސީ އެހެން ޕާޓީތަކުގެ އިސް ލީޑަރުންނަށް ދައުވަތު ފޮނުވާފައިވާކަން ފާހަގަކުރެވެއެވެ.