އައްޑޫ ސިޓީއަށް ދިމާވެފައިވާ ކަރަންޓުގެ ދަތިކަމަށް އެދެވޭ ހައްލެއް ހޯދައިދިނުމުގެ ގޮތުން، އެ ސިޓީގެ ކަރަންޓުގެ އެންމެހައި ޚިދުމަތްތައް ސްޓޭޓް އިލެކްޓްރިކް ކޮމްޕެނީ (ސްޓެލްކޯ) ގެ ދަށަށް ރަސްމީކޮށް ބަދަލުކޮށްފިއެވެ.

މި ޚިދުމަތް ރަސްމީކޮށް ފެށުމުގެ ގޮތުން މިއަދު ހިތަދޫގައި ބޭއްވި ދިދަނެގުމުގެ ޚާއްޞަ ރަސްމިއްޔާތުގައި، ޤައުމީ ދިދަ ނަންގަވައިދެއްވީ އެ ކުންފުނީގެ މެނޭޖިންގ ޑިރެކްޓަރ ޑރ. ޢަލީ އަޒުވަރާއި ޑެޕިއުޓީ މެނޭޖިންގ ޑިރެކްޓަރ ޢާއިޝަތު މުޒްނާއެވެ.

މި ރަސްމިއްޔާތުގައި ވާހަކަފުޅު ދައްކަވަމުން ޑރ. އަޒުވަރު ވިދާޅުވީ، މީގެ 17 އަހަރުގެ ކުރިންވެސް އައްޑޫގައި ކަރަންޓުގެ ޚިދުމަތް ދެމުންއައީ ސްޓެލްކޯއިން ކަމަށެވެ. އަދި އައްޑޫގެ ރައްޔިތުންނަށް އިތުބާރު ހުރި، ދެމެހެއްޓެނިވި ޚިދުމަތެއް ކަށަވަރުކޮށްދެއްވުމުގެ މަޤްޞަދުގައި، މި ޚިދުމަތް އަލުން ސްޓެލްކޯއާ ޙަވާލުކުރެއްވުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ނިންމެވި ނިންމެވުމަކީ ނުހަނު މުހިންމު ނިންމެވުމެއް ކަމުގައި އެމަނިކުފާނު ފާހަގަކުރެއްވިއެވެ.

އައްޑޫއަށް ދިމާވެފައިވާ ކަރަންޓު ކެނޑުމުގެ މައްސަލައަކީ އެ ސިޓީގެ ރައްޔިތުން ޒަމާނުއްސުރެ ތަޙައްމަލުކުރަމުންދާ އެންމެ ބޮޑު އެއް ގޮންޖެހުމެވެ. އެކި ވެރިކަންތަކުގައި މިކަމަށް ހައްލު ހޯދަން މަސައްކަތް ކުރިނަމަވެސް، އަދިވެސް މި މައްސަލައަށް ދާއިމީ ހައްލެއް ލިބިފައެއް ނުވެއެވެ. ނަމަވެސް މި ސަރުކާރުން ވަނީ ވެރިކަމާ ހަވާލުވި ހިސާބުން ފެށިގެން މި މައްސަލަ ހައްލުކުރުމަށް މުހިންމު ފިޔަވަޅުތަކެއް އަޅަން ފަށާފައެވެ.

އެގޮތުން ދާއިމީ ހައްލެއް ގެނައުމަށްޓަކައި، އައްޑޫ ސިޓީގައި ސެންޓްރަލް ޕަވަރ ސްޓޭޝަނެއް އެޅުމުގެ މަސައްކަތް ދުބާއީގެ ޑެފިނިޓް ސޮލިއުޝަންސްއާ ވަނީ ހަވާލުކުރެވިފައެވެ.

މި މަޝްރޫޢުގެ ދަށުން އައު އިންޖީނުގެއެއް ޢިމާރާތްކުރުމާއި، 5.2 މެގަވޯޓުގެ ލޯ-ސްޕީޑު 5 ޖަނަރޭޓަރު ބެހެއްޓުމުގެ އިތުރުން، ބެލްޖިއަމުން ޢަމަލީ ތަމްރީނު ދިނުމަށް ވަނީ ރޭވިފައެވެ. މީގެއިތުރުން، ގްރިޑާ ހަމައަށް ކަރަންޓު ފޯރުކޮށްދިނުމަށް ބޭނުންވާ ހުރިހާ ވަސީލަތްތައް ޤާއިމުކުރުމާއި، ފިޔުލް ފާރމެއް އެޅުމުގެ އިތުރުން ބަންކަރިންގެ ޚިދުމަތް ދިނުންވެސް މި މަޝްރޫޢުގެ ތެރޭގައި ހިމެނެއެވެ.

މި މަޝްރޫޢު ނިމިގެންދާއިރު ސެންޓްރަލް ޕަވަރ ސްޓޭޝަނުން 26.37 މެގަވޯޓުގެ ކަރަންޓު އުފެއްދުމުގެ ޤާބިލުކަން ލިބި، ކުރިއަށް އޮތް 20 އަހަރަށް ބޭނުންވާ މިންވަރަށް އައްޑޫގެ ކަރަންޓު ކެޕޭސިޓީ ކަށަވަރުވެގެންދާނެ ކަމަށް ސަރުކާރުން ވިދާޅުވެއެވެ.

އައްޑޫގެ މި ސެންޓްރަލް ޕަވަރ ސްޓޭޝަނަކީ ގުޅިފައިވާ ހިތަދޫ، މަރަދޫ، މަރަދޫ ފޭދޫ، ފޭދޫ އަދި ގަން ހިމެނޭހެން ޖުމްލަ 5 އަވަށަކަށް ކަރަންޓު ފޯރުކޮށްދެމުން އަންނަ މައި ވިއުގައެވެ.