ކަރަންޓު ކޭބަލްތަކަށް ގެއްލުންދޭ ފަރާތްތަކުން ޚަރަދު ނެގުމަށް ސްޓެލްކޯ އިން ނިންމައިފިއެވެ.

ސްޓެލްކޯ އިން މި ފިޔަވަޅު އަޅަން ނިންމީ ކަރަންޓު ކެނޑުމުގެ ސަބަބުން ރައްޔިތުންނަށް ކުރިމަތިވާ އުނދަގޫތަކަށް ދާއިމީ ހައްލެއް ހޯދައިދިނުމަށާއި އެއްވެސް މެދުކެނޑުމެއް ނެތި ދެމެހެއްޓެނިވި ގޮތެއްގައި ފެންވަރު ރަނގަޅު ޚިދުމަތެއް ފޯރުކޮށްދިނުމަކީ ކުންފުނީގެ މައިގަނޑު މަޤްޞަދެއް ކަމުގައިވާތީއެވެ.

އެ ކުންފުނިން އިތުރަށް ވަނީ އެކި ބޭނުންތަކަށް މަގުތައް ކޮނުމުގެ ތެރޭގައި ކަރަންޓު ވިއުގައަށް ގެއްލުންވެ، ރައްޔިތުންނަށް ދެމުންދާ ކަރަންޓުގެ ޚިދުމަތް މެދުކެނޑޭ ހާދިސާތައް ދުވަހެއް ދުވަހަކަށް އިތުރުވަމުން އަންނަކަން ފާހަގަކޮށްފައެވެ. އަދި މިފަދަ ހާދިސާތަކުގެ ސަބަބުން އާންމު ރައްޔިތުންގެ ދިރިއުޅުމަށާއި، ވިޔަފާރިތަކަށް އިންތިހާއަށް ބޮޑެތި ދަތިތަކާއި ތަކުލީފުތަކާ ކުރިމަތިލާން ޖެހޭކަން ވެސް ފާހަގަކޮށްފައެވެ.

އެހެންކަމުން، މަގުމަތީގައި ކޮނުމުގެ އެކި މަސައްކަތްތައް ކުރިއަށްގެންދާ ސަރުކާރުގެ އިދާރާތަކާއި، އަމިއްލަ ކުންފުނިތަކުގެ އިތުރުން ކޮންޓްރެކްޓަރުން ވެސް، ބިންދަށުގައި އަޅާފައިވާ ކަރަންޓު ވިއުގައަށް އެއްވެސް ގެއްލުމެއް ނުވާނޭހެން، ފުރިހަމަ ޒިންމާދާރުކަމާއެކު މަސައްކަތްތައް ރާވައިގެން ކުރިއަށްގެންދިއުމަށް ވަނީ އިލްތިމާސްކޮށްފައެވެ. އަދި މަސައްކަތް ފެށުމުގެ ކުރިން ކަމާބެހޭ މައުލޫމާތު ސާފުކުރުމަށްވެސް އިލްތިމާސްކުރެއެވެ.