ޕީޕަލްސް ރިޕަބްލިކް އޮފް ޗައިނާ އުފެދުނުތާ 77 އަހަރު ފުރުނު ޤައުމީ ދުވަހުގެ މުނާސަބަތުގައި، އެ ޤައުމުގެ ނައިބު ރައީސް ހާންގ ޒެންގ އަށާއި ޗައިނާގެ އެކުވެރި ރައްޔިތުންނަށް ދިވެހިރާއްޖޭގެ ރައީސުލްޖުމްހޫރިއްޔާގެ ނައިބު ޙުސައިން މުޙައްމަދު ލަޠީފް ހެޔޮއެދުންތަކާއި ތަހުނިޔާ ފޮނުއްވައިފިއެވެ.

ނައިބު ރައީސް ފޮނުއްވި މެސެޖުގައި ވިދާޅުވީ، ފާއިތުވި މަދު އަހަރުތަކުގެ ތެރޭގައި ދިވެހިރާއްޖެއާއި ޗައިނާއާ ދެމެދު އޮތް ގުޅުން ޝައްކެއްނެތް މިންވަރަށް އައު އުސްމިންތަކަކަށް ވާޞިލުވެފައިވާ ކަމަށެވެ.

އަދި ދެ ޤައުމުގެ ދެމެދުގައި އޮތް ބަދަހި އެކުވެރިކަމާއި އެއްބަޔަކު އަނެއް ބަޔަކު ދެނެގަތުމުގެ ވަރުގަދަ ގުޅުން، ކުރިއަށް އޮތް އަހަރުތަކުގައިވެސް އިތުރަށް ހަރުދަނާވެ ބަދަހިވަމުންދާނެ ކަމާމެދު ފުރިހަމަ އިތުބާރާއި ޔަޤީންކަން އެބައޮތް ކަމަށް އެމަނިކުފާނު ފާހަގަކުރެއްވިއެވެ.

ޗައިނާގެ ޤައުމީ ދުވަހުގެ މުނާސަބަތުގައި ނައިބު ރައީސް ޙުސައިން މުޙައްމަދު ލަޠީފް އެ ޤައުމުގެ ވެރިންނަށާއި ރައްޔިތުންނަށް ތަހުނިޔާ ފޮނުއްވާފައިވާއިރު، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުވެސް ވަނީ މި މުނާސަބަތުގައި ޗައިނާގެ ރައީސް ޝީ ޖިންޕިންގ އަށާއި އެ ޤައުމުގެ ރައްޔިތުންނަށް ތަހުނިޔާ ފޮނުއްވައި، ރާއްޖޭގެ ތަރައްޤީގެ ދަތުރުގައި ޗައިނާއަކީ ސާބިތު ބައިވެރިއެއްކަން ފާހަގަކުރައްވާފައެވެ.