ދިފާޢީ އަދި ވަޠަނީ ޚިދުމަތާ ބެހޭ ވަޒީރު، އޮނަރަބަލް ޙަސަން ރަޝީދު، އެމްއެންޑީއެފްގެ ތަމްރީނު މަރުކަޒު ކ. ގިރިފުއްޓަށާއި ކ. ހުރާއަށް ރަސްމީ ޒިޔާރަތެއް ކުރައްވައިފިއެވެ.

މިދިޔަ ސެޕްޓެންބަރު މަހުގެ 28 ވަނަ ދުވަހު ގިރިފުއްޓަށް ކުރެއްވި ޒިޔާރަތުގައި، އެ މަރުކަޒުގައި ސިފައިންގެ ތަމްރީނުތަކުގެ ފެންވަރު މަތިކުރުމަށްޓަކައި މިހާރު ކުރިއަށްގެންދާ ތަރައްޤީގެ މަޝްރޫޢުގެ މަސައްކަތްތައް ކުރިއަށްދާ ގޮތް ވަޒީރު ވަނީ ވަރަށް ގާތުން ބައްލަވާލައްވާފައެވެ.

މީގެއިތުރުން، މި ދަތުރުފުޅުގެ ތެރެއިން ވަޒީރު ވަނީ ކ. ހުރާއަށްވެސް ވަޑައިގެންފައެވެ. އެ ރަށަށް ކުރެއްވި ޒިޔާރަތުގައި، އެމްއެންޑީއެފްގެ މެރިޓައިމް ސެކިއުރިޓީ އޮޕަރޭޝަންތަކަށާއި، ކަނޑުމަތީގެ ސަލާމަތާއި ފުރާނަ ސަލާމަތްކުރުމުގެ އޮޕަރޭޝަންތަކަށް (ސަރޗް އެންޑް ރެސްކިއު) ޚާއްޞަކޮށްގެން ހުރާގައި ބަންނަމުންދާ އިންޓަރސެޕްޓަރ ކްރާފްޓްތަކުގެ މަސައްކަތްތައް ކުރިއަށް ގޮސްފައިވާ މިންވަރު ބައްލަވާލެއްވިއެވެ.

މި ދަތުރުފުޅުގައި ދިފާޢީ އަދި ވަޠަނީ ޚިދުމަތާ ބެހޭ ވަޒީރުގެ އަރިހުގައި ޗީފް އޮފް ޑިފެންސް ފޯސް މޭޖަރ ޖެނެރަލް އިބްރާހީމް ޙިލްމީ ބައިވެރިވެވަޑައިގެންނެވިއެވެ.