ދިވެހިރާއްޖޭގެ ތަރައްޤީގެ ދަތުރުގައި ޗައިނާއަކީ މުހިންމު އަދި ސާބިތު ބައިވެރިއެއް ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.

އެމަނިކުފާނު މިހެން ވިދާޅުވީ ޗައިނާގެ ޤައުމީ ދުވަހުގެ މުނާސަބަތުގައި ފޮނުއްވެވި ތަހުނިޔާގެ މެސެޖުގައެވެ.

ރައީސް ސޯޝަލް މީޑިއާގައި ހިއްސާކުރެއްވި މެސެޖުގައި، ޗައިނާގެ 77 ވަނަ ޤައުމީ ދުވަހުގެ މުނާސަބަތުގައި އެ ޤައުމުގެ ރައީސް ޝީ ޖިންޕިންގއަށާއި، ސަރުކާރަށް އަދި ރައްޔިތުންނަށް ހޫނު މަރުޙަބާއަކާއި ހެޔޮއެދުންތައް ވަނީ ފޮނުއްވާފައެވެ.

ރައީސް ވިދާޅުވީ، ދިވެހިރާއްޖެއާއި ޗައިނާއާ ދެމެދުގައި އޮތީ އެއް ޤައުމު އަނެއް ޤައުމަށް ކުރާ އިޙްތިރާމާއި އިތުބާރުގެ މައްޗަށް ބިނާވެފައިވާ ވަރުގަދަ ރަޙުމަތްތެރިކަމުގެ ގުޅުމެއް ކަމަށެވެ. އަދި ދެ ޤައުމުންވެސް ގެންގުޅެނީ ތަރައްޤީއާއި ފާގަތިކަމަށް އެއްގޮތް ތަޞައްވުރެއްކަން ފާހަގަކުރައްވަމުން، މި ގުޅުމުގެ ސަބަބުން ދެ ޤައުމުގެ ރައްޔިތުންނަށްވެސް މާނަހުރި، ފައިދާހުރި އެތައް ފުރުޞަތުތަކެއް ފަހިވަމުންދާ ކަމަށް ވިދާޅުވިއެވެ.

މީގެއިތުރުން، ދެ ޤައުމުގެ ދެމެދުގައި ޤާއިމުކުރެވިފައިވާ އިސްތިރާޖީ ގުޅުން އިތުރަށް ބަދަހިކޮށް، ގުޅުން އައު ހަރުފަތަކަށް ގެންދިއުމުގައި ދިވެހި ސަރުކާރުން އަބަދުވެސް ސާބިތުކަމާއެކު ދެމިއޮންނާނެ ކަމަށް ރައީސް ވިދާޅުވިއެވެ. އަދި ކުރިއަށް އޮތް ތަނުގައިވެސް ދެ ޤައުމުގެ ރައްޔިތުންގެ މެދުގައިވާ އެކުވެރިކަން ވަރުގަދަވެ، ޗައިނާއަށް މެދުކެނޑުމެއްނެތި ކުރިއެރުމާއި ފާގަތިކަން ލިބުމަށް އެމަނިކުފާނު ވަނީ އެދިވަޑައިގެންފައެވެ.

ޗައިނާގެ ޤައުމީ ދުވަހުގެ ގޮތުގައި ފާހަގަކުރަނީ އޮކްޓޫބަރު މަހުގެ 1 ވަނަ ދުވަހެވެ. މި ދުވަސް ފާހަގަކުރަނީ 1949 ވަނަ އަހަރު، 23 އަހަރުގެ ދާޚިލީ ހަނގުރާމައަށްފަހު، ޗައިނީސް ކޮމިއުނިސްޓް ޕާޓީން ކާމިޔާބީ ހޯދައި ޕީޕަލްސް ރިޕަބްލިކް އޮފް ޗައިނާ ރަސްމީކޮށް އިޢުލާނުކުރި ތާރީޚާ ގުޅުވައިގެންނެވެ. ރާއްޖެއާއި ޗައިނާއާ ދެމެދު ސިޔާސީ ގުޅުން ޤާއިމުކޮށްފައިވަނީ 1972 ވަނަ އަހަރުގެ އޮކްޓޫބަރު މަހުގެ 14 ވަނަ ދުވަހު ކަމަށްވާއިރު، މިއަހަރު އެ ގުޅުމަށް 54 އަހަރު ފުރޭނެއެވެ.