ދިވެހިރާއްޖޭގެ ޤައުމީ ދިފާޢީ ބާރު (އެމްއެންޑީއެފް) ނޮދަން އޭރިއާ ކޮމާންޑުގެ އައު ހެޑްކުއޯޓަރޒް ހދ. ހަނިމާދޫގައި ޤާއިމުކުރުމުގެ މަސައްކަތްތައް ކުރިއަށްދާ ގޮތް، ދިފާޢީ އަދި ވަޠަނީ ޚިދުމަތާ ބެހޭ ވަޒީރު، ޙަސަން ރަޝީދު ބައްލަވާލައްވައިފިއެވެ.

ވަޒީރު މި މަސައްކަތްތައް ބައްލަވާލައްވާފައިވަނީ 2026 ސެޕްޓެންބަރު 24 އިން 26 އަށް އެމްއެންޑީއެފް ނޮދަން އޭރިއާ ކޮމާންޑަށް ކުރެއްވި ރަސްމީ ދަތުރުފުޅުގެ ތެރެއިން، ސެޕްޓެންބަރު މަހުގެ 25 ވަނަ ދުވަހުއެވެ.

މި ޒިޔާރަތުގައި، ހަނިމާދޫގައި އަލަށް ޢިމާރާތްކުރަމުންދާ ހެޑްކުއޯޓަރޒްގެ މަސައްކަތްތައް ކުރިއަށް ގޮސްފައިވާ މިންވަރާއި، އެ ތަނުގެ މަސައްކަތްތައް ރޭވިފައިވާ ގޮތުގެ ތަފްޞީލީ މަޢުލޫމާތު ވަޒީރު ވަނީ އޮޅުންފިލުއްވާފައެވެ.

މި ދަތުރުފުޅުގައި ވަޒީރުގެ އަރިހުގައި ޗީފް އޮފް ޑިފެންސް ފޯސް މޭޖަރ ޖެނެރަލް އިބްރާހީމް ޙިލްމީގެ އިތުރުން، އެމްއެންޑީއެފް ނޮދަން އޭރިއާ ކޮމާންޑުގެ ކޮމާންޑަރ، ބްރިގޭޑިއަރ ޖެނެރަލް އިސްމާޢީލް ޝަރީފް ބައިވެރިވެވަޑައިގެންނެވިއެވެ.

ތިން ދުވަހުގެ މުއްދަތަށް ވަޒީރު ކުރެއްވި މި ދަތުރުފުޅުގެ ތެރެއިން ސެޕްޓެންބަރު 24 ވަނަ ދުވަހު ހދ. ހަނިމާދޫ ޕޯސްޓަށް ޒިޔާރަތްކުރައްވައި އެ ތަނުގެ ސިފައިންނާ ބައްދަލުކުރެއްވިއެވެ. އަދި ދަތުރުފުޅުގެ ފަހު ދުވަސް ކަމުގައިވާ ސެޕްޓެންބަރު 26 ވަނަ ދުވަހު ހއ. އުތީމަށް ޒިޔާރަތްކުރައްވާފައިވާއިރު، އެ ދުވަހު ކޯސްޓްގާޑް ޝިޕް ޢިމާދުއްދީން ފުރަތަމަ ފަހަރަށް އުތީމަށް ބަނދަރުކުރުމުން އެ ރަށު ރައްޔިތުން ވަނީ ސަޤާފީ ހަރަކާތްތަކާއެކު ވަޒީރަށާއި ވަފުދަށް ވަރަށް ހޫނު މަރުޙަބާއެއް ދަންނަވާފައެވެ.