ވިލާ ކޮލެޖުން މިއަހަރު ދަސްވެނިވި ދަރިވަރުންނަކީ ހަމައެކަނި މަޢުލޫމާތުން މުއްސަނދި ބަޔަކަށް ވުމުގެ ބަދަލުގައި، ޢިލްމީ ތެދުވެރިކަމާއި ނަފުސުގެ އަޚްލާޤު އިސްކުރާ ނަމޫނާ ބަޔަކަށް ވުމަށް ފަންނާއި ސަޤާފަތާއި ތަރިކައާ ބެހޭ ވަޒީރު ހީނާ ވަލީދު ގޮވައިލައްވައިފިއެވެ.

ވަޒީރު މިކަމަށް ގޮވައިލެއްވީ ވިލާ ކޮލެޖްގެ މިއަހަރުގެ ދަސްވެނިވުމުގެ ފުރަތަމަ ދަންފަޅީގައި ހިންގުމުގެ ދާއިރާ، އަދި އުނގަންނައިދިނުމާއި ކިޔަވައިދިނުމުގެ ދާއިރާއިން ސަނަދު ޙާޞިލްކުރި ދަރިވަރުންގެ ދަސްވެނިވުން ޝަރަފުވެރިކޮށްދެއްވައި ދެއްކެވި ވާހަކަފުޅުގައެވެ.

ވަޒީރުގެ ވާހަކަފުޅުގައި، ފިކުރީ ވިސްނުންތަކާއި ޢިލްމީ ސިކުނޑިތަކެއް އުފަންކޮށްގެން އެކަނި ނުފުދޭނެކަން ފާހަގަކުރައްވައި، ޤައުމަކަށް ބޭނުންވަނީ ހަރުދަނާ އަޚްލާޤީ ޤިޔަމްތަކެއްގެ މަތީގައި ސާބިތުވެ ތިބޭނެ ބައެއް ކަމަށް ވިދާޅުވިއެވެ. މިގޮތުން އިންސާނީ ކަރާމާތަށް ޙުރުމަތްތެރިކޮށް ހިތުމާއި، އެކަކު އަނެކަކުގެ ޚިޔާލަށް އިޙްތިރާމްކުރުމާއި، ކޮންމެ ކަމެއްގެވެސް ޙަޤީޤަތް ބެލުމުގެ އިތުރުން އަނެކުންނަށް އިޙްތިރާމްކުރުމުގެ ތަހުޛީބީ ސިފަތައް އަށަގަނެފައިވާ ބަޔަކަށް ޢިލްމު ޙާޞިލުކުރާ ފަރާތްތައް ވާންޖެހޭނެ ކަމަށް ވަޒީރު ވިދާޅުވިއެވެ.

ޤައުމެއްގައި ޢިލްމީ ރޫޙެއް ބިނާކޮށް ފިކުރީ ވިސްނުންތަކެއް އާލާކުރެވެނީ އެ ޤައުމެއްގެ ތަރުބަވީ އަދި ތަޢުލީމީ ނިޒާމުގެ ތެރެއިންކަން ފާހަގަކުރައްވައި، ޤައުމު އެއް ޖީލުން އަނެއް ޖީލަށް ނަގަހައްޓައިދިނުމުގެ އެންމެ ބޮޑު މަސްއޫލިއްޔަތެއް އެޅިފައިވަނީ އުނގަންނައިދިނުމުގެ ދާއިރާގެ ބޭފުޅުންގެ ކޮނޑުގައި ކަމަށް ވަޒީރު ހީނާ ވިދާޅުވިއެވެ. އަދި ޙާޞިލުކުރާ ސަނަދަކީ ހަމައެކަނި ލިޔުމެއް ނޫން ކަމަށާއި، މަޢުލޫމާތުގެ މުއްސަނދިކަމާއެކު ޢިލްމީ ތެދުވެރިކަން އިސްކޮށް، ލިބިފައިވާ ހުނަރުގެ ބޭނުން ހިފައިގެން ޤައުމަށް ޚިދުމަތްކުރުމަށް ދަރިވަރުންނަށް އިލްތިމާސްކުރެއްވިއެވެ.

މީގެއިތުރުން، ޤައުމުގެ އިޖްތިމާޢީ ފޭރާމާއި އަޚްލާޤީ މިންގަނޑާމެދު ފުންކޮށް ވިސްނައި، މިކަންކަން ހަމަމަގަށް އަޅުވައި ޙާލަތު ބަދަލުކުރުމަށް އިސްނަގާ މޭސްތިރިންނަށް ވުމަށް ދަސްވެނިންނަށް ވަޒީރު ގޮވާލެއްވިއެވެ.

ވިލާ ކޮލެޖްގެ މިއަހަރުގެ ދަސްވެނިވުމުގެ ޙަފްލާގެ ފުރަތަމަ ދަންފަޅީގައި އެ ކޮލެޖުން ތަޢުލީމު ފުރިހަމަކުރި 201 ދަރިވަރަކު ވަނީ ސަނަދު ޙާޞިލުކޮށްފައެވެ.