އަހަރުތަކެއްގެ އިންތިޒާރަށްފަހު، 'ނަރޫޓޯ' ފްރެންޗައިޒްއިން އާ އެނިމޭއެއް ނެރޭނެކަން ކަށަވަރުކޮށްދީފިއެވެ.

މިކަމާ ގުޅޭ އިތުރު ތަފްސީލުތައް އަންނަ އޮކްޓޯބަރ 10 ވަނަ ދުވަހު ނިއު ޔޯކް ސިޓީ ކޮމިކް ކޮންގައި ބާއްވާ "ނަރޫޓޯ: ވަޓްސް ނެކްސްޓް" ޕެނަލްގައި ހާމަކުރާނެއެވެ.

މި އާ އެނިމޭގެ ޚަބަރު ހާމަކޮށްފައިވަނީ ނަރޫޓޯ/ބޮރޫޓޯގެ ރަސްމީ ޖަޕާނު އެކްސް އެކައުންޓުންނެވެ.

މި ޕޯސްޓާއެކު، ގިނަ ބަޔަކު ލަފާކުރަނީ މިއީ ގިނަ ދުވަސްތަކެއް ވަންދެން ވާހަކަދެކެވެމުން އައި ނަރޫޓޯގެ އާ 4 އެޕިސޯޑުގެ މައުލޫމާތު ކަމަށެވެ. ނަމަވެސް އެހެން އެނިމޭއެއް އިއުލާންކުރުމުގެ ފުރުސަތުވެސް އެބައޮތެވެ.

ފޭނުން އެންމެ ބޮޑަށް އިންތިޒާރުކުރަމުންދަނީ "ބޮރޫޓޯ: ޓޫ ބްލޫ ވޯޓެކްސް" ގެ އެނިމޭއަކަށެވެ. ބޮރޫޓޯ އެނިމޭގެ ފުރަތަމަ ބައި 2023 ގައި ވަރަށް ޝައުގުވެރި ހިސާބަކުން ނިމިފައިވާއިރު، ޓޫ ބްލޫ ވޯޓެކްސް މަންގާ ނެރޭތާ މިހާރު 3 އަހަރު ވަނީ ވެފައެވެ. ބޮރޫޓޯގެ ފުރަތަމަ އެނިމޭއަށްވުރެ ބޮޑަށް ފޭނުންނަށް ކަމުދަނީ ޓޫ ބްލޫ ވޯޓެކްސްގެ ވާހަކައެވެ. މި އާ ވާހަކައިގައި، ކަވާކީ އަދި އޭޑާގެ ރޭވުންތަކާ ހެދި ބޮރޫޓޯ ފެންނަނީ ސާސްކޭ ފަދައިން ރޯގް ނިންޖާއެއްގެ ގޮތުގައެވެ.