ނޭޝަނަލް ކޮލެޖް އޮފް ޕޮލިސިންގ އެންޑް ލޯ އެންފޯސްމަންޓުން ހިންގާ އިންވެސްޓިގޭޝަން އޮފިސަރ ކޯހުގެ 32 ވަނަ ބުރު ރަސްމީކޮށް ފަށައިފިއެވެ.

މި ސެޕްޓެމްބަރު މަހުގެ 27 ވަނަ ދުވަހު ދ. ވާނީގައި 25 ފުލުހުންނާއެކު ފެށި މި ކޯހަކީ، ފުލުހުންގެ ތެރޭގައި ޤާބިލު އިންވެސްޓިގޭޝަން އޮފިސަރުން އުފެއްދުމަށާއި، އެ އޮފިސަރުންގެ ހުނަރާއި ޤާބިލުކަން ތަރައްޤީކުރުމުގެ އިތުރުން ކްރިމިނަލް އިންވެސްޓިގޭޝަން ދާއިރާގެ ޢިލްމު ފޯރުކޮށްދިނުމަށް ޚާއްޞަކޮށްގެން ފަރުމާކުރެވިފައިވާ ކޯހެކެވެ.

މި ކޯހުގައި މައިގަނޑު ގޮތެއްގައި ކިޔަވައިދޭ ބައިތަކުގެ ތެރޭގައި ކުށް ހިނގި ސަރަޙައްދު ބަލައި ފާސްކުރުން (ކްރައިމް ސީން އިންވެސްޓިގޭޝަން)، ތަޙުޤީޤީ އިންޓަވިއު ކުރުމުގެ އުކުޅުތައް، ހެކި ހޯދުމާއި ރައްކާތެރިކުރުން އަދި މައްސަލަތައް އެކުލަވާލައި ކޯޓަށް ހުށަހެޅުން (ކޭސް ޕްރެޒެންޓޭޝަން) ހިމެނެއެވެ. މީގެއިތުރުން ޤާނޫނީ ކަންކަމަށް އަހުލުވެރިކުރުވުމުގެ ކްލާސްތަކާއި، ކޯޓުގެ އެކި މަރުޙަލާތަކުގައި ތަޙުޤީޤީ ބައި ކުރިއަށްގެންދާނެ ގޮތްތައް ޢަމަލީ ގޮތުން ދަސްކޮށްދިނުމަށް ވަނީ ހަމަޖެހިފައެވެ.

ފުލުހުންގެ ޚިދުމަތުން މަޢުލޫމާތު ދެއްވި ގޮތުގައި، މި ކޯހުގެ ކިޔެވުމާއި ޢަމަލީ އެޓޭޗްމަންޓް ކާމިޔާބުކަމާއެކު ފުރިހަމަކުރުމުން، މި ކޯހުގައި ބައިވެރިވި ފުލުހުންނަށް އިންވެސްޓިގޭޝަން އޮފިސަރެއްގެ ގޮތުގައި މައްސަލަތައް ތަޙުޤީޤުކުރުމުގެ ފުރިހަމަ ޤާބިލުކަމާއި ޝަރުޠުތައް ހަމަވެގެންދާނެއެވެ.