ދުނިޔޭގެ އެކި ކަންކޮޅުތަކުގައި ބޮޑު މަޤުބޫލުކަމެއް ހޯދި ކޮމެޑީ ސީރީޒް 'ފްރެންޑްސް' ގެ ތަރި، މެތިއު ޕެރީގެ ހަޔާތުގެ މައްޗަށް އުފައްދާފައިވާ ޚާއްޞަ ޑޮކިއުމެންޓްރީ "ދަ ވަން އެބައުޓް މެތިއު ޕެރީ" ގެ ޓްރެއިލަރ ނެޓްފްލިކްސް އިން އާންމުކޮށްފިއެވެ.

މި ޑޮކިއުމެންޓްރީގެ ނަން ދީފައިވަނީ 'ފްރެންޑްސް' ސީރީޒްގެ އެޕިސޯޑުތަކަށް ނަންދޭ ޚާއްޞަ ގޮތަށް ނިސްބަތްކޮށެވެ.

މި ޑޮކިއުމެންޓްރީގައި މެތިއު ޕެރީގެ ކާމިޔާބު އެކްޓިންގ ކެރިއަރާއި، "ފްރެންޑްސް" ގައި ކުޅުނު ޗޭންދްލަރ ބިންގްގެ ރޯލުން އޭނާ ހޯދި އާދަޔާޚިލާފު މަޝްހޫރުކަމުގެ އިތުރުން، އޭނާގެ އަމިއްލަ ދިރިއުޅުމުގައި މަސްތުވާތަކެއްޗާ ދެކޮޅަށް ކުރި ހިތްވަރުގަދަ ހަނގުރާމައަށް ފުންކޮށް އަލިއަޅުވާލާފައިވެއެވެ.

އަދި އާއިލާ އާއި މެތިއު ޕެރީގެ ގާތް އެތައް ބައެއްގެ އިންޓަވިއުތައްވެސް މި ޑޮކިއުމެންޓްރީގައި ހިމަނާފައިވެއެވެ.

މި އަސަރުގަދަ ޓްރެއިލަރ ނެރުމާއެކު، މެތިއު ޕެރީގެ އެތައް މިލިއަން ފޭނުންނެއް ދަނީ ސޯޝަލް މީޑިއާގައި އޭނާގެ ހަނދާންތައް އާކޮށް، މި ޑޮކިއުމެންޓްރީ ބަލާލަން ކެތްމަދުވެފައިވާކަން ހާމަކުރަމުންނެވެ.

މިއީ މެތިއު ޕެރީގެ ފޭނުންނަށް އޭނާގެ ހަޔާތުގެ ގިނަ ކަންތައްތަކެއް އެނގިގެންދާނެ ވަރަށް ޚާއްޞަ އުފެއްދުމަކަށް ވާނެކަމަށް ބެލެވެއެވެ.

މި ޑޮކިއުމެންޓްރީ ޕްރިމިއަރ ކުރަން ހަމަޖެހިފައިވަނީ މި އަންނަ މަހުގެ 27 ގައިއެވެ.