މޯލްޑިވްސް ކަރެކްޝަނަލް ސަރވިސްގެ ޖަލަށް ވަތް މީހަކު 26،600 ރުފިޔާއިން ޖޫރިމަނާކުރުމަށް ކުރިމިނަލް ކޯޓުން ހުކުމް ކޮށްފިއެވެ.

ހުޅުމާލެ އޮނުގަސް މަގުގައި ހުންނަ އެމްސީއެސްގެ ޖަލަށް ހުއްދަނެތި ވަނީ ހުޅުމާލެ ފްލެޓް ނަމްބަރު 40-1-123 އާޒިމް މުހައްމަދުއެވެ.

އޭނާގެ މައްޗަށް ދައުލަތުން ކުރީ އެނގިހުރެ ހުއްދަނޫން ތަނަކަށް ވަނުމުގެ ދައުވާއެވެ. އެއީ މިދިޔަ ޖޫން މަހުގެ 20 ވަނަ ދުވަހުގެރޭ ހުޅުމާލެ ޖަލަށް ހުއްދަނެތި ވަދެފައިވާތީ އެވެ.

މި މައްސަލައިގެ ތަހުގީގުގައި 11 ދުވަސް އޭނާ ބަންދުގައި ހޭދަކޮށްފައިވުމާއި، ދައުވާއަށް އިއުތިރާފުވެފައި ވާތީ، އޭނާގެ މައްޗަށް ކުރިމިނަލް ކޯޓުން ކަނޑައެޅީ، ހަތަރު މަހާއި 13 ދުވަހުގެ މުއްދަތަށް ޖަަލަށްލުމުގެ އަދަބެކެވެ. އެކަމަކު އެ އަދަބު ކަނޑައެޅުމަށްފަހު ޖަލު އަދަބުގެ ބަދަލުގައި އާޒިމް ތަންފީޒު ކުރަން ޖެހޭ އަދަބަކީ 26،600 ރުފިޔާއިން ޖޫރިމަނާ ކުރުމުގެ އަދަބެއް ކަމަށް ވަނީ ކަނޑައަޅާފައެވެ. އަދި މިފައިސާ ހަ މަސްދުވަހުގެ ތެރޭގައި މޯލްޑިވްސް އިންލެންޑް ރެވެނިއު އޮތޯރިޓީއަށް ދެއްކުމަށް އާޒިމަށް އަންގާ، ހުކުމް ކޮށްފައި ވެއެވެ.