މާވެލް ސިނަމެޓިކް ޔުނިވަރސްގެ 2026 ވަނަ އަހަރުގެ އެންމެ ކާމިޔާބު ފިލްމު ކަމަށްވާ "ސްޕައިޑަރ-މޭން: ބްރޭންޑް ނިއު ޑޭ" ގޭގައި ތިބެގެން ބަލާލެވޭނެ ތާރީޚުތައް ރަސްމީކޮށް އިއުލާންކޮށްފިއެވެ.

ސޯނީ ޕިކްޗަރސްއިން ހާމަކޮށްފައިވާ ގޮތުގައި، މި ފިލްމު ޑިޖިޓަލްކޮށް ނެރުމަށް ހަމަޖެހިފައިވަނީ އޮކްޓޯބަރ މަހުގެ 6 ވަނަ ދުވަހުއެވެ. އަދި 4ކޭ ޔޫ.އެޗް.ޑީ، ބްލޫ-ރޭ، އަދި ޑީވީޑީގެ ގޮތުގައި ޑިސެމްބަރ 15 ވާ އަންގާރަ ދުވަހު ނެރުމަށް ވަނީ ނިންމާފައެވެ.

ޑެސްޓިން ޑެނިއަލް ކްރެޓަން ޑައިރެކްޓްކޮށްފައިވާ މި ފިލްމަށް ދުނިޔޭގެ ބޮކްސް އޮފީހުގައި 2.49 ބިލިއަން ޑޮލަރުގެ އާމްދަނީއެއް ލިބިފައިވެއެވެ.

މިއާއެކު މިއީ 2026 ވަނަ އަހަރުގެ އެންމެ ގިނަ އާމްދަނީ ހޯދި ފިލްމުގެ އިތުރުން، 2021 ގައި ނެރުނު "ނޯ ވޭ ހޯމް" ގެ ރެކޯޑުތައް މުގުރާލައި، އެންމެ ބޮޑު އާމްދަނީއެއް ހޯދި ސްޕައިޑަރ-މޭން ފިލްމަށް ވަނީ ވެފައެވެ.

ފިލްމުގެ ޑިޖިޓަލް އަދި ފިޒިކަލް ރިލީޒްތަކުގައި ފޭނުންނަށް ކަމުދާނެ ޚާއްޞަ ފީޗަރެޓްތަކެއް ހިމެނޭނެއެވެ. މީގެ ތެރޭގައި ސޭޑީ ސިންކް ކުޅެފައިވާ ޖީން ގްރޭ އަދި ޖޯން ބަރންތަލްގެ ޕަނިޝަރގެ ކެރެކްޓަރާ ގުޅޭ ޚާއްޞަ މަންޒަރުތައް ހިމެނެއެވެ.

"ޓޮމް ހޮލަންޑް: ދަ އިވޮލްވިންގ ސްޕައިޑަރ"، "ބްރޭންޑް ނިއު ޑިރެކްޝަން" އަދި "ފްރެންޑްސް އެންޑް ފޯސް" ފަދަ ޚާއްޞަ ބައިތައް ޑީވީޑީ އެޑިޝަންގައި ހިމެނޭނެއެވެ.

ސްޕައިޑަރ-މޭން 5 އާ ގުޅޭގޮތުން އަދި ރަސްމީކޮށް އެއްޗެއް ބުނެފައިނުވާއިރު، ސޯނީގެ ކުރީގެ ސީއީއޯ އޭމީ ޕާސްކަލް ބުނެފައިވާ ގޮތުގައި މާވެލްއާއެކު މަސައްކަތްކުރަނީ "ޕިކްޗަރ-ބައި-ޕިކްޗަރ" އުސޫލުން ކަމަށެވެ.

ޓޮމް ހޮލަންޑްގެ ސްޕައިޑަރ-މޭން ދެން ފެންނާނީ ފޭސް 6 ގެ ފަހު ދެ ފިލްމު ކަމަށްވާ "އެވެންޖަރސް: ޑޫމްސްޑޭ" އިން ތޯ ނުވަތަ "އެވެންޖަރސް: ސީކްރެޓް ވޯރސް" އިން ތޯ އަދި ކަށަވަރެއް ނުވެއެވެ.