"ދަ ބިގް ބޭންގ ތިއަރީ" ގެ ސްޕިންއޮފް ސީރީޒް "ސްޓުއާޓް ފެއިލްސް ޓު ސޭވް ދަ ޔުނިވަރސް" ގެ ދެވަނަ ސީޒަން އަންނަ އަހަރު ނެރޭނެކަން ކަށަވަރުކޮށްދީ، ޝޫޓިންގ ފަށާނެ ތާރީޚު އިއުލާންކޮށްފިއެވެ.

ޑެޑްލައިން އަށް ދިން އިންޓަވިއުއެއްގައި ޝޯގެ ކޯ-ކްރިއޭޓަރ ޗަކް ލޯރ ހާމަކުރިގޮތުގައި، ދެވަނަ ސީޒަންގެ ޝޫޓިންގ ފަށަން ހަމަޖެހިފައިވަނީ މިއަންނަ އަހަރުގެ ޖެނުއަރީ ނުވަތަ ފެބްރުއަރީ މަހުއެވެ.

އޭނާ އިތުރަށް ބުނިގޮތުގައި އުފެއްދުންތެރިންގެ އަމާޒަކީ ޝޫޓިންގ ފެށުމުގެ ކުރިން ހުރިހާ އެޕިސޯޑެއްގެ ސްކްރިޕްޓް ލިޔެ ނިންމައި، ފުރަތަމަ ސީޒަނެކޭ އެއްގޮތަށް ފެންވަރު ރަނގަޅު އުފެއްދުމެއް ގެނެސްދިނުން ކަމަށެވެ.

އެޗް.ބީ.އޯ މެކްސް އިން މި ޝޯގެ ދެވަނަ ސީޒަނެއް ހަދަން ނިންމީ ފުރަތަމަ ސީޒަންގެ ފަހު އެޕިސޯޑު ނެރުމުގެ ވެސް އެއް މަސް ކުރިންނެވެ.

ޝޯ ނެރޭނެ ދުވަހަކާ ގުޅޭގޮތުން ލޯރީ ބުނެފައިވަނީ އަންނަ އަހަރުގެ ފަހުކޮޅު ޝޯ ނެރެވޭނެކަމަށް އުންމީދުކުރާ ކަމަށެވެ. އަދި އޭގެ ކުރިން ސެން ޑިއޭގޯ ކޮމިކް-ކޮން 2027 ގައި ދެއްކުމަށްޓަކައި އެއް އެޕިސޯޑު ނުވަތަ ދެ އެޕިސޯޑު ނިންމުމަށް މަސައްކަތްކުރާނެ ކަމަށްވެސް އޭނާ ބުންޏެވެ.

ޝޯގެ އަނެއް ކޯ-ކްރިއޭޓަރ ޒެކް ޕެން ވެސް ވަނީ، އެޗް.ބީ.އޯ މެކްސްގެ އެހެން ޝޯތަކާ ޚިލާފަށް މީގެ ދެ ސީޒަން ދެމެދު ދެ އަހަރު ނުނަގާނެ ކަމަށާއި، 2027 ގައި ޝޯ ނެރޭނެކަން ޔަގީންކޮށްދީފައެވެ.

މި ސައިންސް ފިކްޝަން ކޮމެޑީގެ ފުރަތަމަ ސީޒަން ނިމުނުއިރު ސްޓުއާޓް، ޑެނީސް، ބާޓް އަދި ބެރީ ތިބީ އާދަޔާޚިލާފު އެހެން ރިއާލިޓީއެއްގައެވެ. ފުރަތަމަ ސީޒަނުން ޕެނީ، އޭމީ އަދި ރާޖް ފަދަ "ދަ ބިގް ބޭންގ ތިއަރީ" ގެ މަޝްހޫރު ކެރެކްޓަރުންގެ އޯލްޓަނޭޓް ވަރޝަންތައް ފެނިގެންދިޔައިރު، ދެވަނަ ސީޒަނުންވެސް އިތުރު ތަރިން ފެންނާނެކަމަށް ބެލެވެއެވެ.