އޮޅުވާލައިގެން ކަނޑުމަގުން ރާއްޖެއަށް އެތެރެކުރަން އުޅުނު 8 މިލިއަނަށްވުރެ ގިނަ ސިނގިރޭޓު، މޯލްޑިވްސް ކަސްޓަމްސް ސަރވިސްއިން އަތުލައިގެންފިއެވެ.

މި ތަކެތި އަތުލައިގެންފައިވަނީ މި ސެޕްޓެމްބަރު މަހުގެ 27 ވަނަ ދުވަހު މާލޭ ވިޔަފާރި ބަނދަރުގައި ހިންގި ޚާއްޞަ އޮޕަރޭޝަނެއްގެ ތެރެއިންނެވެ. ކަސްޓަމްސްއިން މަޢުލޫމާތު ދެއްވި ގޮތުގައި، މި ތަކެތި އެތެރެކުރަން މަސައްކަތްކޮށްފައިވަނީ "ޖެނެރަލް ކާގޯ" ގެ ގޮތުގައި މަކަރާއި ޙީލަތުން ޑިކްލެއަރ ކޮށްގެންނެވެ. ނަމަވެސް އެ ޝިޕްމަންޓް ބަލައިފާސްކުރުމުގެ ތެރޭގައި، އޭގެ ތެރޭގައި ފޮރުވާފައި ހުރި ގިނަ ޢަދަދެއްގެ ސިނގިރޭޓު ވަނީ ފެނިފައެވެ.

މި އޮޕަރޭޝަނުގައި ކަސްޓަމްސްގެ ބެލުމުގެ ދަށަށް ގެންގޮސްފައިވަނީ ޖުމްލަ 8،527،480 (އަށް މިލިއަން ފަސްލައްކަ ހަތާވީސްހާސް ހަތަރުސަތޭކަ އައްސިހަ) ސިނގިރޭޓް ސްޓިކެވެ. އެއީ 426،374 ފޮށި ސިނގިރޭޓުގެ އިތުރުން 42 ހާހަށްވުރެ ގިނަ ކާޓަން ސިނގިރޭޓެވެ.

ދުންފަތުގެ ބާވަތްތަކަކީ ދައުލަތަށް ބޮޑު ޑިއުޓީއެއް ނަގާ ބާވަތްތަކެއް ކަމަށްވާއިރު، މިހާރު ޤާނޫނު އޮންނަގޮތުން ރާއްޖެއަށް އެތެރެކުރާ ކޮންމެ ސިނގިރޭޓަކުން 4 ރުފިޔާގެ ޑިއުޓީއެއް ނަގައެވެ. އެހެންކަމުން މިއީ ދައުލަތަށް ލިބެންޖެހޭ ބޮޑު ޢަދަދެއްގެ ޓެކްސް ފައިސާއަށް މަކަރު ހަދައިގެން އެތެރެކުރަން އުޅުނު ޝިޕްމަންޓެއްކަން ފާހަގަކުރެވެއެވެ.

މި މައްސަލަ ކަސްޓަމްސްއިން މިހާރު ދަނީ ވަރަށް ސީރިއަސް މައްސަލައެއްގެ ގޮތުގައި ބަލައި، އިތުރަށް ތަޙުޤީޤުކުރަމުންނެވެ.