ރައްޔިތުންނަށް ފޯރުކޮށްދެމުންދާ ޔުޓިލިޓީ ޚިދުމަތްތަކުގެ ސިޔާސަތުތަކަށް ގެންނަންޖެހޭ ބަދަލުތަކާ ގުޅޭގޮތުން އަޅަންޖެހޭ ފިޔަވަޅުތަކާ ބެހޭގޮތުން މަޝްވަރާކުރެއްވުމަށްޓަކައި، ކަމާބެހޭ ކުންފުނިތަކުގެ މެނޭޖިންގ ޑިރެކްޓަރުންނާ މޫސުމީ ބަދަލުތަކާއި ތިމާވެއްޓާއި ހަކަތައާ ބެހޭ ވަޒީރު ޢަލީ ޝަރީފް ބައްދަލުކުރައްވައިފިއެވެ.

މި ބައްދަލުވުމުގައި ސްޓޭޓް އިލެކްޓްރިކް ކޮމްޕެނީ (ސްޓެލްކޯ)، މާލެ ވޯޓަރ އެންޑް ސެވަރޭޖް ކޮމްޕެނީ (އެމްޑަބްލިޔުއެސްސީ) އަދި ފެނަކަ ކޯޕަރޭޝަންގެ މެނޭޖިންގ ޑިރެކްޓަރުންގެ އިތުރުން، މިނިސްޓްރީއާއި ކަމާގުޅުންހުރި އެކި އިދާރާތަކުގެ އިސްވެރިން ވަނީ ބައިވެރިވެވަޑައިގެންފައެވެ.

މި ބައްދަލުވުމުގެ މައިގަނޑު މަޤްޞަދަކީ ޔުޓިލިޓީ ދާއިރާއިން ރައްޔިތުންނަށް ދެމުންގެންދާ ޚިދުމަތްތައް އިތުރަށް ހަރުދަނާކޮށް، ސަރުކާރުގެ ސިޔާސަތުތަކާ އެއްގޮތްވާ ގޮތުގެ މަތިން ޚިދުމަތްތަކުގެ ފެންވަރު މަތިކުރުމަށްޓަކައި އަޅަންޖެހޭ ފިޔަވަޅުތައް ދެނެގަނެ، އެކަންކަން ތަންފީޒުކުރުމަށް މަޝްވަރާކުރުމެވެ. މިގޮތުން ފެނާއި، ނަރުދަމާ އަދި ކަރަންޓުގެ ޚިދުމަތް ފޯރުކޮށްދިނުމުގައި މިހާރު ދިމާވާ ދަތިތަކާއި ގޮންޖެހުންތައް ޙައްލުކުރުމަށް ކުރެވިދާނެ ކަންކަމާ ގުޅޭގޮތުން ފުޅާ ދާއިރާއެއްގައި ވަނީ ޚިޔާލު ބަދަލުކުރައްވާފައެވެ.

މި ބައްދަލުވުމުގައި ވަޒީރު ޢަލީ ޝަރީފް ދެއްކެވި ވާހަކަފުޅުގައި، ރައްޔިތުންނަށް ލުއިފަސޭހަ އަދި އިތުބާރުހުރި ގޮތެއްގައި އަސާސީ މިފަދަ ޚިދުމަތްތައް ފޯރުކޮށްދިނުމަކީ ސަރުކާރުން ނުހަނު ޚާއްޞަ އިސްކަމެއް ދެއްވާ ކަމެއް ކަމަށް ވިދާޅުވިއެވެ. އަދި މި ލަނޑުދަނޑިތައް ޙާޞިލުކުރުމަށްޓަކައި ކަމާގުޅޭ އެންމެހައި މުއައްސަސާތަކާއި ކުންފުނިތައް އެކުއެކީގައި ގުޅިގެން މަސައްކަތްކުރުމުގެ މުހިންމުކަމުގެ މައްޗަށް ވަޒީރު ވަނީ އަލިއަޅުއްވާލައްވާފައެވެ.