ސޭފްޓީ އެންޑް ސެކިޔުރިޓީ ދާއިރާގައި މަސައްކަތްކުރާ އެންމެހައި ފަރާތްތަކުގެ ޢަޒުމަކަށް ވާންވީ، ދުނިޔޭގެ އެންމެ ރައްކާތެރި ޤައުމަށް ދިވެހިރާއްޖެ ހެދުން ކަމަށް ދާޚިލީ ސަލާމަތާއި މަސައްކަތްތެރިކަމާއި ފަންނިއްޔާތާ ބެހޭ ވަޒީރު ޢަލީ އިޙްސާން ވިދާޅުވެއްޖެއެވެ.

ވަޒީރު މިހެން ވިދާޅުވީ މޯލްޑިވްސް އެސޯސިއޭޝަން އޮފް ފަޔަރ، ސޭފްޓީ އެންޑް ސެކިޔުރިޓީ އިންޑަސްޓްރީ (މަފްސީ) އިން އިންތިޒާމުކޮށްގެން ދެ ދުވަހުގެ މުއްދަތަށް ކުރިއަށްގެންދާ ސޭފްޓީ އެންޑް ސެކިޔުރިޓީ ކޮންފަރެންސް ފެށުމުގެ ރަސްމިއްޔާތު ޝަރަފުވެރިކޮށްދެއްވައި ވާހަކަފުޅު ދައްކަވަމުންނެވެ. މިއީ ރާއްޖޭގެ ފަތުރުވެރިކަމުގެ ދާއިރާއަށް ޚާއްޞަކޮށްގެން މިފަދަ ގޮތަކަށް ބާއްވާ ފުރަތަމަ ކޮންފަރެންސެވެ.

މި ރަސްމިއްޔާތުގައި ވާހަކަދައްކަވަމުން ވަޒީރު ވިދާޅުވީ، ދުނިޔޭގެ އެންމެ މަޤްބޫލު މަންޒިލްގެ ގޮތުގައި ރާއްޖެ އޮތްއިރު، ރާއްޖެ އަންނަ މެހެމާނުންގެ ރައްކާތެރިކަން އެންމެ ފުރިހަމައަށް ކަށަވަރުވެފައި އޮތުމަކީ ނުހަނު މުހިންމު ކަމެއް ކަމަށެވެ. އަދި އެކަން ޙާޞިލުކުރެވޭނީ ސަރުކާރުގެ މުއައްސަސާތަކާއި، ފަތުރުވެރިކަމުގެ ދާއިރާގެ ކުންފުނިތަކާއި އަމިއްލަ ސެކިއުރިޓީ ފަރާތްތައް ގުޅިގެން ކުރާ މަސައްކަތުން ކަމަށް ފާހަގަކުރެއްވިއެވެ.

ވަޒީރު އިތުރަށް ފާހަގަކުރެއްވި ގޮތުގައި، ފަތުރުވެރިކަމުގެ ދާއިރާގައި ހިނގާ އާދައިގެ ކުށްތަކުގެ އިތުރުން އަލިފާނުގެ ހާދިސާތަކާއި، ކަނޑުމަތީގެ ނުރައްކާތަކާއި، ޤުދުރަތީ ކާރިސާތަކާއި، ސައިބަރ އެޓޭކްތަކާއި، އޮންލައިން ފްރޯޑްގެ ޢަމަލުތަކުގެ އިތުރުން މަސްތުވާތަކެއްޗާއި ޢާންމު ޞިއްޙަތާ ގުޅުންހުރި ކަންކަމަށް ޚާއްޞަ ސަމާލުކަމެއް ދޭންޖެހެއެވެ. އަދި ރާއްޖެއަކީ ކުޑަ ޖަޒީރާ ޤައުމަކަށް ވާތީ، ދުނިޔޭގެ އެކި ކަންކޮޅުތަކުގައި ފެތުރޭ ނޭދެވޭ ކަންކަން ރާއްޖެއަށް ފެތުރުމުގެ ފުރުޞަތު ބޮޑުކަމުން، ކަމެއް ވުމުގެ ކުރިން ދުރާލައި ރައްކާތެރިވެ ތިބުމުގެ މުހިންމުކަން ވަނީ ހަނދާންކޮށްދެއްވާފައެވެ.

ރާއްޖެއަކީ ރައްކާތެރި އަދި ހަމައެއާއެކު ވިލުންތެރި މަންޒިލަކަށް ވާންޖެހޭކަން ފާހަގަކުރައްވައި ވަޒީރު ވިދާޅުވީ، ރައްކާތެރި މަންޒިލެއްގައި މަސައްކަތް ކުރާނީ މިއަދު ދިމާވާ ކަންކަމަށް ޙައްލު ހޯދަން ކަމަށާއި، ނަމަވެސް ވިލުންތެރި މަންޒިލެއްގައި މަސައްކަތް ކުރާނީ މުސްތަޤުބަލަށް ދުރާލައި ވިސްނައިގެން ކަމަށެވެ. އެހެންކަމުން ހަރުދަނާ ސިޔާސަތުތަކާއި، ޒަމާނީ ޓެކްނޮލޮޖީއާއި، ތަމްރީނުތަކާއި އިންވެސްޓްމަންޓްތަކުގެ އެހީގައި މިކަންކަން ހަރުދަނާކުރުމަށް ސަރުކާރުގެ ފުރިހަމަ އެއްބާރުލުން ފަތުރުވެރިކަމުގެ ސިނާޢަތަށް ލިބިގެންދާނެ ކަމުގެ ޔަޤީންކަން ވަޒީރު ވަނީ ދެއްވާފައެވެ.

ދެ ދުވަހުގެ މުއްދަތަށް ކުރިއަށްދާ މި ކޮންފަރެންސްގައި، ދައުލަތުގެ މުއައްސަސާތަކާއި ފަތުރުވެރިކަމާއި ސަލާމަތީ ދާއިރާގެ އިސް ފަރާތްތަކުގެ މެދުގައި ޚިޔާލު ބަދަލުކުރުމަށް ހަމަޖެހިފައިވާއިރު، މި ސެޝަންތައް ނަންގަވައިދެއްވަނީ ރާއްޖެއާއި ބައިނަލްއަޤްވާމީ ފެންވަރުގެ ތަޖުރިބާކާރުންނެވެ.