ކާރްތިކް އާރްޔަންގެ މަޝްހޫރު ފިލްމު ޗަންދޫ ޗެމްޕިއަން އިން ބެސްޓް އެކްޓަރ ގެ ކެޓަގަރީއިން ނޭޝަނަލް އެވޯޑު ކާމިޔާބުކުރުމަށްފަހު އޭނާގެ ކުރިއަށް އޮތް ފިލްމު "ކެޕްޓަން އިންޑިއާ" ގެ ސެޓަށް އެނބުރި ދިއުމުން، ފިލްމުގެ ކްރޫގެ ފަރާތުން އޭނާއަށް ހޫނު މަރުހަބާއެއް ކިޔައިފިއެވެ.

މި ބޮޑު ކާމިޔާބީއާ ގުޅިގެން ކެޕްޓަން އިންޑިއާގެ ޓީމުން ވަނީ ސެޓުގައި ކާރްތިކްއަށް ޚާއްސަ ސަޕްރައިޒެއް ދީފައެވެ.

މިގޮތުން ކޭކު ފަޅައި، މުޅި ޓީމުން އޭނާއަށް މަރުހަބާ ކިޔާފައިވާ މަންޒަރުތައް ސޯޝަލް މީޑިއާގައި ވަނީ އާންމުވެފައެވެ.

ކާރްތިކްއަށް ލިބުނު މި ޝަރަފަކީ އޭނާ ފިލްމީ ދާއިރާގައި ކުރަމުން އަންނަ ބުރަ މަސައްކަތުގެ ނަތީޖާކަން ގިނަ ބަޔަކު ދަނީ ފާހަގަކުރަމުންނެވެ.

ޝިމިޓް އަމިން ޑައިރެކްޓްކުރާ "ކެޕްޓަން އިންޑިއާ" ގައި ކާރްތިކް ފެނިގެންދާނީ ހިތްވަރުގަދަ ޕައިލެޓެއްގެ ރޯލުންނެވެ. ހަގީގީ ހާދިސާތަކެއްގެ މައްޗަށް ބިނާކޮށް ހަދާ މި ފިލްމަކީ އިންޑިއާގެ ތާރީޚުގައި ހިންގާފައިވާ އެންމެ ކާމިޔާބު އެއް ރެސްކިއު މިޝަންގެ ވާހަކަ ކިޔައިދޭ ފިލްމެކެވެ. މީގެ ކުރިން ކާރްތިކް ކުޅެފައިވާ ރޯލުތަކާ މުޅިން ތަފާތު ސީރިއަސް ރޯލަކުން އޭނާ ފެނިގެންދާނެތީ، ބެލުންތެރިން ތިބީ މި ފިލްމަށް ވަރަށް ބޮޑަށް އިންތިޒާރުކޮށްގެންނެވެ.