"ދިވެހިންގެ އުފެއްދުންތެރިކަމުގެ މައުރަޒު 2026" ގައި ތަކެތި ބަލައިގަންނަ ތާރީހު އާންމުކޮށްފި އެވެ.

ދިވެހިންގެ އުފެއްދުންތެރިކަމުގެ މައުރަޒުގައި ވާދަކުރުމުގެ ބައިގައި ބައިވެރިވުމުގެ ފުރުސަތު ބަންދުވެފައިވާއިރު، ފޯމު ހުށައެޅި ފަރާތްތަކުން ހުށައަޅާ ހުށައެޅުންތައް ރަޖިސްޓްރީކުރުމުގެ ފުރުސަތު މިހާރުވަނީ ހުޅުވާލާފަ އެވެ.

ބިޒްނަސް ސެންޓާ ކޯޕަރޭޝަން (ބީސީސީ) އިން ބުނީ މިހާތަނަށް 6000އަށްވުރެ ގިނަ ތަކެތި މައުރަޒުގައި ބެހެއްޓުމަށް ރަޖިސްޓްރީކޮށްފައިވާ ކަމަށެވެ.

މައުރަޒުގައި ބައިވެރިކުރާ ކާބޯތަކެތީގެ ގިންތިތަކާއި ބަލައިގަންނަ ތާރީހުގެ ތެރެއިން، ކާބޯތަކެތީގެ ގިންތިއާއި ދަނޑުވެރިކަމުގެ އުފެއްދުންތައް އަދި ވެލިއު އެޑިޝަން އާއި މަސްވެރިކަމުގެ އުފެއްދުންތައް އަދި ވެލިއު އެޑިޝަން ބަލައިގަންނަ ތާރިހަކީ މިއަންނަ މަހުގެ 15 ދުވަހު އެވެ. އަދި ކޭކް ޑެކަރޭޝަން 17 އޮކްޓޯބަރު މަހު ބަލައިގަންނަން ހަަމަޖެހިފައިވާއިރު، އެހެނިހެން ހުރިހާ އުފެއްދުންތައް ބަލައިގަންނަ ހަމަޖެހިފައިވާއިރު ތާރީހަކީ އޮކްޓޯބަރު 7 އިން 13 އަށެވެ.

ބީސީސީން ބުނީ އިންފޮމޭޝަން އެންޑް ކޮމިއުނިކޭޝަން ޓެކްނޮލޮޖީ ގިންތީގެ އުފެއްދުންތައް އޮންލައިން ލިންކެއް މެދުވެރިކޮށް ބަލައިގަންނައިރު، އެ ލިންކް ފަހުން ހިއްސާކުރާނެ ކަމަށެވެ.ތަކެތި ބަލައިގަތުމަށް ހަމަޖެހިފައިވަނީ މި މުއްދަތުގެ ތެރޭގައި ކޮންމެ ދުވަހަކު ހެނދުނު 10:00 އިން ރޭގަނޑު 20:00 އަށް ހުޅުމާލެ ސެންޓްރަލް ޕާކްގައި މައުރަޒު ބޭއްވުމަށް ހަމަޖެހިފައިވާ ސަރަހައްދުގަ އެވެ. ތަކެތި ހަވާލުކުރާއިރު ޕޯޓަލް މެދުވެރިކޮށް ހުށަހަޅަންޖެހޭ ހުރިހާ މައުލޫމާތު ފުރިހަމަ ކުރަންޖެހޭއިރު، ބަންދުކުރަންޖެހޭ ތަކެތި ހުންނަންވާނީ ރައްކާތެރިކަމާއެކު ބަންދުކޮށްފައިކަމަށް ބީސީސީން ބުންޏެވެ.

މިއަހަރުގެ ދިވެހިންގެ އުފެއްދުންތެރިކަމުގެ މައުރަޒު އޮންނާނީ އޮކްޓޯބަރު 25 އިން 2 ނޮވެންބަރަށެވެ.

އުފެއްދުންތެރިކަމުގެ މައުރަޒަކީ، ދިވެހިރާއްޖޭގެ އުފެއްދުންތެރިންނާއި ހުނަރުވެރިންގެ ހުނަރާއި އުފެއްދުންތައް އެއްތަނަކުން ދައްކާލާ، މާކެޓު ކުރުމުގެ ފުރުޞަތު ހޯދައިދިނުމަށް އިންތިޒާމުކުރާ އެންމެ ބޮޑު މައުރަޒެވެ.