މޯލްޑިވްސް ޕޯޓްސް ލިމިޓެޑް (އެމް.ޕީ.އެލް)ގެ 40 ވަނަ އަހަރީ ދުވަސް ފާހަގަކުރުމަށް ގޮތުން "ސްޓާފް ނައިޓް" 25 ސެޕްޓެމްބަރ 2026 ވަނަ ދުވަހުގެ ރޭ ވަނީ ބާއްވައިފިއެވެ.

 ހުޅުމާލޭގެ ފަރުކޮޅުފުށީގައި ބޭއްވި މި ހަފްލާ ޝަރަފުވެރިކޮށްދެއްވީ މާލީކަންކަމާއި ސަރުކާރު ކުންފުނިތަކާ ބެހޭ ވުޒާރާގެ ވަޒީރު ޙަސަން ޒަރީރު އެވެ. އަދި ޚާއްސަ މެހެމާނެއްގެ ގޮތުގައި ޞިއްޙަތާއި ޢާއިލާއާއި އިޖުތިމާއީ އެހީއާ ބެހޭ ވަޒީރު ޤީލާ ޢަލީ ބައިވެރިވެވަޑައިގަތެވެ. މީގެއިތުރުން މިހަފްލާގައި އެމް.ޕީ.އެލްގެ ސީ.އީ.އޯ ކެޕްޓަން ޙުސައިން ޝަފީޤާއި ކުންފުނީގެ އެންމެ އިސްވެރިންނާއި ގިނަ އަދަދެއްގެ މުވައްޒަފުންވެސް ބައިވެރިވި އެވެ.

 މި ރަސްމިއްޔާތުގައި ވާހަކަދައްކަވަމުން މިނިސްޓަރ ޒަރީރު ވަނީ ބަނދަރުގެ ޚިދުމަތް ފޯރުކޮށްދިނުމުގައި އެމް.ޕީ.އެލްގެ މުވައްޒަފުން ކުރަމުންދާ ބުރަ މަސައްކަތުގެ އަގު ވަޒަންކުރައްވައިފައެވެ.

 "އެމް.ޕީ.އެލް އަދާކުރަނީ ހަމައެކަނި ވިޔަފާރި ކުންފުންޏެއްގެ ދައުރެއް ނޫން؛ މިއީ މުޅި ގައުމުގެ އިގުތިސާދީ ސަލާމަތާއި ރައްޔިތުންގެ ދިރިއުޅުމާ ސީދާ ގުޅިފައިވާ ގައުމީ ބޮޑު ޚިދުމަތެއް،" މިނިސްޓަރ ޒަރީރު ވިދާޅުވިއެވެ.

 އެމް.ޕީ.އެލްގެ ސީ.އީ.އޯ ޝަފީގު ވަނީ މާލޭ ވިޔަފާރި ބަނދަރުގައި މި ވަގުތު ގިނަ ދަތިތަކެއް ހުރި ނަމަވެސް " ރޭގަނޑާއި ދުވާލު، ވާރޭގައާއި އަވީގައި، ޤައުމަށް ބޭނުންވާ ކާބޯތަކެއްޗާއި މުދާ ހުއްޓުމެއްނެތް ގޮތެއްގައި ފޯރުކޮށްދިނުމަށް" އެމް.ޕީ.އެލްގެ މުވައްޒަފުން ކުރަމުންދާ ބުރަ މަސައްކަތަށް ޝުުކުރު އަދާކުރާ ކަމަށެވެ.  އަދި މާލޭ ވިޔަފާރި ބަނދަރު ތިލަފުއްޓަށް ބަދަލުކުރުމުގެ ބޮޑު މަޝްރޫޢު ފަށާފައިވާއިރު، މއީ މި ވަގުތު ބަނދަރަށް ދިމާވެފައިވާ ދަތިތައް ހައްލުވާނެ މަޝްރޫޢެއްކަން ސީ.އީ.އޯ ޝަފީގު ފާހަގަކުރެއްވިއެވެ.

 މި ހަފްލާގައި ފާއިތުވި އަހަރު ހަތަރު ކެޓަގަރީއަކުން އެންމެ ރަނގަޅު މުވައްޒަފުންނަށް ވަނީ އެވޯޑް ދީފައެވެ. މީގެ އިތުރުން އިތުރުން 35 އަހަރަށް ވުރެ ދިގު މުއްދަތަކަށް ޚިދުމަތްކޮށްފައިވާ މުވައްޒަފުންނަށް ހަނދާނީ ފިލާ ހަވާލުކުރެއްވުމާއި، ރިޓަޔާރޑް މުވައްޒަފުންނަށް ހަނދާނީ ފިލާ ހަވާލުކުރެއްވުންވެސް މިހަފްލާގައި ކުރިއަށް ގެންގޮސްފައިވެ އެވެ.  އަދި، އުމުރުން 20 އަހަރުގައި ޤުރުއާން ހިތުދަސްކޮށް، ޙާފިޡުކަމުގެ ސަަނަދު ހާސިލްކޮށްފައިވާތީ، އެކަމުގެ އަގުވަޒަންކޮށް، ހިތްވަރު ދިނުމުގެ ގޮތުން އަލްހާފިޡު ޚުސައިން ޒައިން ޢަލީ އަށް ވަނީ ޚާއްސަ އެވޯޑެއް ދީފައެވެ.