ވޭތުވެދިޔަ އެއް ހަފްތާގެ ތެރޭގައި މާލެ ސަރަޙައްދުން އިތުރު 13 މީހަކަށް ހިމަބިހި (މީޒަލްސް) ޖެހިގެން ރިޕޯޓުކޮށްފައިވާ ކަމަށް ހެލްތު ޕްރޮޓެކްޝަން އެޖެންސީ (އެޗްޕީއޭ) އިން ހާމަކޮށްފިއެވެ.

އެޗްޕީއޭއިން އާންމުކޮށްފައިވާ އެންމެ ފަހުގެ ތަފާސްހިސާބުތަކަށް ބަލާއިރު، މި އަހަރުގެ މިހާތަނަށް ރާއްޖެއިން ހިމަބިހި ޖެހުނު މީހުންގެ ޖުމްލަ އަދަދު ވަނީ 282 އަށް އަރާފައެވެ. އަދި މި ބަލި ފެތުރުން ކޮންޓްރޯލް ކުރުމަށްޓަކައި މިހާތަނަށް 16,423 މީހުންނަށް ހިމަބިހީގެ ވެކްސިން ދީފައިވާ ކަމަށްވެސް އެ އެޖެންސީން މަޢުލޫމާތު ދެއެވެ.

ބަލިން ރައްކާތެރިވުމުގެ ފިޔަވަޅުތަކާ ގުޅޭގޮތުން އެޗްޕީއޭއިން އިލްތިމާސްކޮށްފައިވާ މުހިންމު ކަންތައްތައް:

• ވެކްސިން ފުރިހަމަކުރުން: ހިމަބިހީގެ ދެ ޑޯޒް ވެކްސިން ފުރިހަމަކުރެވުނުކަން ޔަޤީންނުވާ ފަރާތްތަކުން ޚާއްޞަ ވެކްސިން ސެންޓަރުތަކަށް ގޮސް ޑޯޒްތައް ފުރިހަމަކުރުން.
• ކޮންޓެކްޓުން ވެކްސިން ޖެހުން: ބަލި ޖެހިފައިވާ މީހަކާ ބައްދަލުވެފައިވާ ފަރާތްތަކުގެ ތެރެއިން ދެ ޑޯޒް ފުރިހަމަނުވާ ފަރާތްތަކުން، ކޮންޓެކްޓުންނަށް ޚާއްޞަކޮށްފައިވާ ގަޑިތަކުގައި ލަސްނުކޮށް ވެކްސިން ޖެހުން.
• ފަރުވާ ހޯދުމާއި އެކަހެރިވުން: ހުން އައުމާއެކު ހަށިގަނޑުގައި ރަތް ބިހިތަކެއް ނަގާނަމަ ލަސްނުކޮށް ޑޮކްޓަރަށް ދެއްކުމާއި، ހިމަބިއްސަށް ޝައްކުކުރެވިގެން ޓެސްޓު ހަދައިފިނަމަ ނަތީޖާ ލިބެންދެން އެކަހެރިވެގެން ގޭގައި މަޑުކުރުން. އަދި ޞިއްޙީ ޚިދުމަތްދޭ ތަންތަނަށް ދާއިރު މާސްކު އެޅުމަށް ވަނީ އިރުޝާދު ދީފައެވެ.
• ޢާންމު ތަންތަނަށް ނުދިއުން: ބަލީގެ އަލާމާތެއް ހުރިނަމަ މީހުން އެއްވެ އުޅޭ ތަންތަނަށް ނުގޮސް ގޭގައި މަޑުކުރުން.

ޞިއްޙީ މަޢުލޫމާތު ހޯދުމުގައި ހަމައެކަނި ރަސްމީ އިދާރާތަކުން ނެރޭ އިތުބާރުހުރި މަޢުލޫމާތަށް ބަރޯސާވުމަށްވެސް އެޗްޕީއޭއިން ވަނީ ހަނދާންކޮށްދީފައެވެ.