ބޮލީވުޑްގެ މަޝްހޫރު މިއުޒިކް ޑައިރެކްޓަރ އަދި ލަވަކިޔުންތެރިޔާ ހިމޭޝް ރޭޝަމިޔާ، އާޔުޝްމާން ކުރާނާ އަދި ޝަރްވާރީ ވާގް ލީޑު ރޯލުން ފެނިގެންދާ އައު ފިލްމެއްގެ ޓައިޓަލް ޓްރެކް "ޔޭ ޕްރޭމް މޯލް ލިޔާ" ވަރަށް ކުލަގަދަކޮށް ލޯންޗުކުރުމަށް ތައްޔާރުވެއްޖެއެވެ.

މި ލަވަ އާންމުންނަށް ދައްކާލުމަށް ހަމަޖެހިފައިވަނީ ސެޕްޓެމްބަރު 20 ވަނަ ދުވަހު ބާއްވާ ޚާއްސަ ލައިވް އިވެންޓެއްގައެވެ.

މި އިވެންޓުގެ އެންމެ ޚާއްސަ އެއް ކަމަކީ ހިމޭޝް މި ލަވަ ހުށަހަޅައިދޭނީ 25 މީހުންގެ މައްޗަށް އެކުލެވޭ ބޮޑު އޯކެސްޓްރާ ބޭންޑަކާއެކު ލައިވްކޮށް ކަމަށްވުމެވެ.

މިއީ ފަހުގެ ތާރީޚެއްގައި ބޮލީވުޑް ފިލްމެއްގެ ލަވައެއް މިހާ ފުރިހަމަ އިންތިޒާމަކާއެކު ލޯންޗުކުރާ ފުރަތަމަ ފަހަރެވެ.

އާޔުޝްމާން އާއި ޝަރްވާރީގެ މި ފިލްމަކީ ގިނަ ބަޔަކު އިންތިޒާރުކުރަމުންދާ ފިލްމަކަށް ވާއިރު، މިފަދަ ބޮޑު އިވެންޓަކާއެކު ލަވަ ނެރުމުން ފިލްމަށް އޮތް ޝައުގުވެރިކަން އިތުރުވެގެންދާނެ ކަމަށް ބެލެވެއެވެ.