އިންޑިއާގެ ފެޝަން ދުނިޔޭގެ އެންމެ ނުފޫޒުގަދަ ޑިޒައިނަރުން ކަމަށްވާ އަބޫ ޖާނީ އަދި ސަންދީޕް ކޯސްލާގެ ފެޝަން ދަތުރަށް 40 އަހަރު ފުރުން ފާހަގަކުރުމަށް މުމްބާއީގައި ބޭއްވި ކުލަގަދަ ހަފްލާގައި، ބޮލީވުޑްގެ ފެޝަން އައިކަން ސޯނަމް ކަޕޫރު އަދި އަމީތާބް ބައްޗަންގެ ކާފަދަރިފުޅު ނަވްޔާ ނަވޭލީގެ ތަފާތު ސްޓައިލަށް ގިނަ ބައެއްގެ ސަމާލުކަން ލިބިއްޖެއެވެ.

މި ހަފްލާގައި ބޮލީވުޑްގެ އެންމެ ފުންނާބުއުސް ފެޝަން ތަރި ސޯނަމް ކަޕޫރު ފެނިގެންދިޔައީ ކުރީގެ ޝާހީ އަދި ކްލެސިކް ސްޓައިލެއްގައެވެ. އަބޫ-ސަންދީޕްގެ ޚާއްޞަ އެމްބްރޮއިޑަރީ އަދި ރަންކުލައިގެ ފަރުމާތަކުން ޖަރީކޮށްފައިވާ ހުދު އަދި ކްރީމް ކުލައިގެ ދިގު ހެދުމަކާއެކު، އޭނާ ބޭނުންކޮށްފައިވަނީ އިންޑިއާގެ ސަގާފީ، މޮޅު ގަހަނާތަކެކެވެ. ސޯނަމްގެ މި ހައިބަތު ބޮޑު ހެދުމާއި، ބޮލުގެ އިސްތަށިގަނޑު ސްޓައިލްކޮށްފައިވާ ގޮތުން އޭނާ ފެނުނީ ހަމަ އަސްލުވެސް ރާނީއެއް ފަދައިން ކަމަށް ފެޝަން ކްރިޓިކުން ވަނީ ބުނެފައެވެ.

ސޯނަމްގެ މި ސަގާފީ ޝާހީ ފެނިލުމާ މުޅިން ތަފާތުކޮށް، ނަވްޔާ ފެނިގެންދިޔައީ ޒަމާނީ އަދި ހިތްގައިމު ސްޓައިލެއްގައެވެ. ނަވްޔާ ލައިގެން ހުރީ ވަރަށް ފުރިހަމައަށް ވިދާ ބަބުޅާ، ރަން ކުލައިގެ މިނީ ޑްރެސްއެކެވެ. މުޅި ހެދުމުގައި ވިދާ އެސްތަކާއި ޖަވާހިރުގެ މަސައްކަތް ފެންނަން ހުރިއިރު، އޭނާ އިޚްތިޔާރުކުރީ މާބޮޑަށް ގަހަނާ ބޭނުންނުކޮށް، އާދައިގެ ނެޗުރަލް މޭކަޕަކާއެކު ހެދުމުގެ ފުރިހަމަކަން މައިގަނޑު ގޮތެއްގައި ދައްކުވައިދިނުމަށެވެ.

އަބޫ ޖާނީ އާއި ސަންދީޕް ކޯސްލާގެ މި ހަފްލާއަކީ އިންޑިއާގެ ސަގާފީ ޝާހީ ފެޝަނާއި، ޒަމާނީ މޮޑާން ފެޝަންގެ މުއްސަނދިކަން އެއްތަނަކުން ފެނިގެންދިޔަ ހަފްލާއެކެވެ.

ސޯނަމް އަދި ނަވްޔާގެ އިތުރުން މުޅި އަމްބާނީ އާއިލާ އާއި، އެތައް ތަޖުރިބާކާރު ފަންނާނުންވެސް މި ޚާއްޞަ ހަފްލާއިން ފެނިގެންދިއައެވެ.